8.2.3.1. Accións e participacións admitidas a negociación en mercados oficiais

Cando a alteración no valor do patrimonio proceda da transmisión a título oneroso de valores admitidos a negociación nalgún dos mercados secundarios oficiais de valores definidos na Directiva 2004/39/CE do Parlamento Europeo e do Consello, do 21 de abril de 2004, relativa aos mercados de instrumentos financeiros, e representativos da participación en fondos propios de sociedades ou entidades, a ganancia ou perda computarase pola diferenza entre o seu valor de adquisición e o valor de transmisión, determinado pola súa cotización nos devanditos mercados na data en que se produza aquela ou polo prezo pactado cando sexa superior á cotización.

Cando existan valores homoxéneos considerarase que os transmitidos polo contribuínte son aqueles que adquiriu en primeiro lugar (art. 37.2 Lei).

DEREITOS DE SUBSCRICIÓN

Para a determinación do valor de adquisición deducirase o importe obtido pola transmisión dos dereitos de subscrición realizada ata o 31 de decembro de 2016. Porla venda de dereitos de subscrición realizada a partir do un de xaneiro de 2017, estes computarán como ganancias patrimoniais, separadamente da venda de accións. O importe obtido pola transmisión de dereitos de subscrición procedente destes valores ou participacións terá a consideración de ganancia patrimonial para o transmitente no período impositivo en que se produza a citada transmisión, considerando como período de permanencia dos dereitos o que corresponda aos valores dos que procedan.

Non obstante, se o importe obtido na transmisión dos dereitos de subscrición chegase a ser superior ao valor de adquisición dos valores dos que procedan tales dereitos, a diferenza terá a consideración de ganancia patrimonial para o transmitente, no período impositivo en que se produza a transmisión, considerando como período de permanencia dos dereitos o que corresponda aos valores dos que procedan.

Cando non se transmita a totalidade dos dereitos de subscrición, entenderase que os transmitidos corresponden aos valores adquiridos en primeiro lugar (art. 37.2 Lei).

ACCIÓNS LIBERADAS

1. Accións totalmente liberadas

   Cando se trate de accións totalmente liberadas, o valor de adquisición tanto destas como de que procedan resultará de repartir o custo total entre o número de títulos, tanto os antigos coma os liberados que correspondan; e considerarase como antigüidade das mesmas a que corresponda ás accións das que procedan (art.37.2 Lei).

2. Accións parcialmente liberadas

   Cando se trate de accións parcialmente liberadas, o seu valor de adquisición será o importe realmente satisfeito polo contribuínte e a súa antigüidade será a que corresponda segundo a data da entrega.

DISTRIBUCIÓN DA PRIMA DE EMISIÓN E REDUCIÓN DE CAPITAL CON DEVOLUCIÓN DE ACHEGAS

No caso de distribución da prima de emisión de accións ou participacións, ou de redución de capital que teña por finalidade a  devolución de achegas (art. 33.3.a) Lei), o importe obtido minorará, ata a súa anulación, o valor de adquisición das accións ou participacións afectadas e o exceso que, se é o caso, resulte tributará como rendemento de capital mobiliaria. Se a redución de capital procede de beneficios non distribuídos, a totalidade das cantidades percibidas por este concepto tributarán de acordo co previsto no apartado 1º do artigo 25.1.a) da Lei.