9.8.1. Condicións e requisitos xerais de aplicación

En xeral, os contribuíntes que realicen actividades económicas teñen dereito aos incentivos e estímulos ao investimento empresarial establecido na normativa do Imposto sobre Sociedades, con igualdade de límites e porcentaxes de dedución, con dúas excepcións: 

1. Dedución por actividades de investigación e desenvolvemento e innovación tecnolóxica (Art. 39.2 Lei do Imposto sobre Sociedades). Posibilidade de aplicación sen quedar sometida ao límite conxunto da cota íntegra. 

2. Aquela que permite solicitar, no caso de insuficiencia de cota, o aboamento anticipado de dedución por investimento en produción estranxeira de longametraxes cinematográficas ou de obras audiovisuais. (Art. 39.3 Lei do Imposto de Sociedades)

Estes incentivos só serán de aplicación aos contribuíntes en réxime de estimación obxectiva cando así se estableza expresamente.

Non obstante, as cantidades pendentes de deducir procedentes de investimentos realizados en exercicios anteriores en que o rendemento se determinase no réxime de estimación directa, poderán deducirse nesta declaración e ata a terminación do prazo legal concedido para iso, aínda que os suxeitos pasivos titulares estean acollidos neste exercicio ao réxime de estimación obxectiva.

Os investimentos realizados por entidades en réxime de atribución de rendas (sociedades civís que non estean suxeitas ao Imposto sobre Sociedades, herdanzas xacentes, comunidades de bens, etc.) que determinen os seus rendementos netos en estimación directa, poderán ser obxecto de dedución por cada un dos socios, herdeiros ou comuneiros en proporción á súa participación no beneficio da entidade (art. 8 Lei).