Saltar ao contido principal

Desarticulada unha organización dedicada ao contrabando de tabaco con destino a outros países europeos

Operación ‘Peirún’

  • A colaboración de Vixilancia Aduaneira da Axencia Tributaria e a Alfándega de Francia permitiu a incautación de máis de 1.400.000 caixetiñas de tabaco e 14,5 toneladas de picadura
  • Foron detidos nove membros da organización, que introducía a mercadoría por Irún ata naves de Cataluña e Navarra, onde se introducía en caixas de repostos de automóbiles antes do seu envío a destino

30 de decembro de 2021.- O Servizo de Vixilancia Aduaneira da Axencia Tributaria, en colaboración coa Alfándega de Francia, desarticulou unha organización dirixida por cidadáns españois que se dedicaba ao envío de importantes cargamentos de tabaco de contrabando a outros países europeos. A organización contaba con varias naves en Cataluña e Navarra onde introducía o tabaco en caixas de repostos de automóbiles para o seu posterior envío a destino.

Como resultado da operación, denominada ‘Peirún’, foron detidos nove membros da organización, seis deles de nacionalidade española, dous brasileiros e un portugués, e logrouse a aprehensión de máis de 1.400.000 caixetiñas, cun valor de mercado estimado en máis de seis millóns de euros, e 14,5 toneladas de picadura, na que foi unha das maiores incautacións do ano en materia de tabaco de contrabando.

As actuacións conxuntas comezan coa intervención en Francia, a finais de marzo pasado, dun camión cargado con 14.500 quilos de picadura de tabaco que se dirixía a España. A aprehensión levada a cabo pola Brigada de La Rochelle de la Aduana francesa dá inicio a unha serie de investigacións combinadas por presuntos delitos de contrabando e organización criminal en relación cunha organización que utilizaba unha empresa de transportes con camións portugueses para trasladar importantes cargamentos de tabaco de contrabando entre países europeos. 

Vixilancia e intervención de cargamento

Froito dos labores de vixilancia despregados por funcionarios de Vixilancia Aduaneira de Cataluña, País Vasco e Navarra, púidose determinar que a organización introducía mercadoría en España pola localidade guipuscoana de Irún, e que contaba con diferentes naves en Navarra e Cataluña onde almacenaba o tabaco que posteriormente enviaba a outros países europeos pola fronteira de La Jonquera (Girona).

Xa no mes de xuño funcionarios de Vixilancia Aduaneira en Girona detectaron ao seu paso por La Jonquera un dos camións que previamente fora visto nunha nave vixiada de El Vendrell (Tarragona). De inmediato dáse a alerta á Alfándega francesa, cuxa Brigada de Perpignan localiza o vehículo e, na posterior inspección, intervén 350.000 caixetiñas de tabaco da marca ‘Sixt’ ocultas dentro de caixas de repostos de automóbiles, detendo á súa vez os dous condutores, de nacionalidade brasileira.

As investigacións continúan e a finais de novembro pasado os funcionarios de Vixilancia Aduaneira de Girona e País Vasco realizan o seguimento doutro camión que se dirixía a un almacén en El Vendrell, observando, novamente, que no almacén se carga o mesmo tipo de mercadoría, e detectan que o transporte volve ter por destino Italia, nesta ocasión partindo do porto de Barcelona. Os funcionarios interveñen o camión e descobren 452.000 caixetiñas de tabaco da marca ‘Regina’, de novo oculto en caixas de repostos de automóbiles, o que motiva a detención do condutor, de nacionalidade portuguesa.

Rexistro en Tarragona e últimas detencións

Procédese nese momento ao rexistro da nave de El Vendrell e á detención do seu responsable, de nacionalidade española. No interior da nave encontráronse outras 667.000 caixetiñas de tabaco desta última marca e máis caixas de repostos de automóbiles, polo que se procedeu á detención do responsable da nave, de nacionalidade española.

En datas posteriores realizáronse varios rexistros, dous deles en Italia coa colaboración da Oficina Europea de Loita contra a Fraude (OLAF), un en Navarra e outro en Barcelona, e á detención dos outros cinco integrantes da organización, todos eles de nacionalidade española.

Vixilancia Aduaneira:Presentación de denuncias por contrabando e delitos relacionados 

Teléfono gratuíto 900351378.

Email:denunciasvigilanciaaduanera@correo.aeat.es

Filmación do operativo (para descargar o vídeo débese introducir a seguinte dirección web):

https://we.tl/t-5uxgNn7QHN