3.1.2.1. Exención de determinados premios

Premio literario,  artístico  ou científico relevante 

Terá a consideración de premio literario, artístico ou científico relevante a concesión de bens ou dereitos a unha ou varias persoas, sen contraprestación, en recompensa ou recoñecemento ao valor de obras literarias, artísticas ou científicas así como ao mérito da súa actividade ou labor, en xeral, en tales materias.

Non terán a consideración de premios exentos as bolsas, axudas e, en xeral, as cantidades destinadas ao financiamento previo ou simultánea de obras ou traballos relativos ás materias citadas.

Requisitos de premio

• O concedente do premio non poderá realizar ou estar interesado na explotación económica da obra ou obras premiadas.

  En particular, o premio non poderá implicar nin esixir a cesión ou limitación dos dereitos de propiedade sobre aquelas, incluídos os derivados da propiedade intelectual ou industrial.

  Non se considerará incumprido este requisito pola mera divulgación pública da obra, sen finalidade lucrativa e por un período de tempo non superior a seis meses.

• En todo caso, o premio deberá concederse respecto de obras executadas ou actividades desenvolvidas con anterioridade á súa convocatoria.

Requisitos da convocatoria do premio

A convocatoria deberá reunir os seguintes requisitos:

1. Premios convocados en España

   • Ter carácter nacional ou internacional.
   • Non establecer limitación algunha con respecto aos concursantes por razóns alleas á propia esencia do premio.
   • Que o seu anuncio se faga público no Boletín Oficial do Estado ou da Comunidade Autónoma e en, polo menos, un xornal de gran circulación nacional.
2. Premios convocados no estranxeiro ou por Organizacións Internacionais

   Os premios que se convoquen no estranxeiro ou por Organizacións Internacionais só terán que cumprir o requisito de non establecer limitación algunha con respecto aos concursantes por razóns alleas á propia esencia do premio.

Solicitude de exención

A declaración da exención terá que ser solicitada, con achega da documentación pertinente, por:

1. A persoa ou entidade convocante do premio, con carácter xeral.

   A solicitude deberá efectuarse con carácter previo á concesión do premio.

   Se a Administración tributaria declara a exención do premio, a persoa ou entidade convocante virá obrigada a comunicar, dentro do mes seguinte ao de concesión, a data desta , o premio concedido e os datos identificadores de quen resultasen beneficiados polos mesmos.

2. A persoa premiada, cando se trate de premios convocados no estranxeiro ou por Organizacións Internacionais.

   Neste caso, a solicitude deberá efectuarse antes do inicio do período regulamentario de declaración do exercicio en que se obtivese.

Declaración da exención

A exención deberá ser declarada polo órgano competente da Administración tributaria, de acordo co procedemento que aprobe o ministro de Economía e Facenda.

Para a resolución do expediente poderá solicitarse informe do Departamento ministerial competente por razón da materia ou, se é o caso, do órgano correspondente das Comunidades Autónomas.

A declaración terá validez para sucesivas convocatorias sempre que non se modifiquen os termos daquela que motivou o expediente.

Premios de determinadas lotarías e apostas:  gravame e contía exenta (disposición adicional trixésimo terceira e disposición adicional trixésimo quinta Lei de IRPF)

Non se integran na base impoñible do IRPF, pero se están suxeitos ao devandito imposto mediante un gravame especial os seguintes premios:

• Os premios obtidos das lotarías e apostas organizadas pola Sociedade Estatal Loterías y Apuestas del Estado e polos órganos ou entidades das Comunidades Autónomas.
• Os premios obtidos dos sorteos organizados pola Cruz Vermella Española.
• Os premios obtidos das modalidades de xogo autorizado pola ONCE
• Os premios organizados por organismos públicos ou entidades que exerzan actividades de carácter social ou asistencial sen ánimo de lucro establecido noutros estados membros da Unión Europea ou do Espazo Económico Europeo e persigan obxectivos idénticos aos dos organismos ou entidades antes sinalados.

Os premios sometidos a este gravame sempre que a contía do décimo, fracción ou cupón de lotaría, ou da aposta efectuade sexa de polo menos 0,50 euros estarán exentos cando o seu importe íntegro sexa igual ou inferior a 20.000 euros.

Se a contía do décimo, fracción ou cupón fóra inferior a 0,50 euros a contía exenta reducirase proporcionalmente.

O resto de premios (distintos dos enumerados) considéranse ganancias patrimoniais e integrarán a base impoñible xeral do IRPF.