7.3.6.1. Concepto e individualización e atribución de rendas

Concepto (art. 22 Lei)

Terán a consideración de rendementos do capital inmobiliario a totalidade das utilidades ou contraprestacións, calquera que sexa a súa denominación ou natureza, monetarias ou en especie, que proveñan, directa ou indirectamente, de bens inmobles, tanto rústicos coma urbanos, cuxa titularidade corresponda ao contribuínte e non se achen afectos a actividades económicas realizadas polo mesmo.

Non obstante, as rendas derivadas da transmisión da titularidade de bens inmobles tributarán como ganancias ou perdas patrimoniais.

Individualización e atribución de rendas

Os rendementos do capital atribuiranse aos contribuíntes que, segundo o previsto no artigo 7 da Lei 19/1991, do 6 de xuño, do Imposto sobre o Patrimonio, sexan titulares dos elementos patrimoniais, bens ou dereitos, de que proveñan os devanditos rendementos (art. 11.3 Lei).

As rendas correspondentes ás sociedades civís que non estean suxeitas ao Imposto sobre Sociedades, teñan ou non personalidade xurídica, herdanzas xacentes, comunidades de bens e demais entidades a que se refire o artigo 35.4 da Lei 58/2003, do 17 de decembro, Xeral Tributaria, atribuiranse aos socios, herdeiros, comuneiros ou partícipes, respectivamente, segundo as normas ou pactos aplicables en cada caso e, se estes non constasen á Administración Tributaria en forma fidedigno, atribuiranse por partes iguais (art. 89.3 Lei). As rendas correspondentes a estas entidades deberán declararse no apartado F da páxina 8 da declaración.

Titularidade dos elementos patrimoniais, bens ou dereitos art. 7 Lei 19/91)

Os bens e dereitos atribuiranse a contribuíntes segundo as normas sobre titularidade xurídica aplicables en cada caso e en función das probas achegadas por aqueles ou das descubertas pola Administración.

Se é o caso, serán de aplicación as normas sobre titularidade xurídica dos bens e dereitos contidos nas disposicións reguladoras do réxime económico do matrimonio, así como nos preceptos da lexislación civil aplicable en cada caso ás relacións patrimoniais entre os membros da familia.

A titularidade dos bens e dereitos que, conforme ás disposicións ou pactos reguladores do correspondente réxime económico matrimonial, sexan comúns a ambos os dous cónxuxes, atribuirase por metade a cada un deles , non sendo que se xustifique outra cota de participación.

Cando non resulte debidamente acreditada a titularidade dos bens ou dereitos, a Administración Tributaria terá dereito a considerar como titular a quen figure como tal nun rexistro fiscal ou outro de carácter público.

As cargas, gravames, débedas e obrigas, atribuiranse aos suxeitos pasivos segundo as regras e criterios dos parágrafos anteriores.