Ingresos íntegros e amortizacións

Unha vez seleccionado o ou os "Produtos" que se corresponden coa actividade desenvolvida reflectirá para cada un deles os ingresos procedentes dos produtos obtidos ou dos servizos prestados.

Como regra xeral, os ingresos deberán consignarse na primeira fila da xanela de captura de datos, para que o programa aplique os índices de rendemento neto xerais.

Non obstante, en previsión de que por circunstancias excepcionais sexan aprobados, para algúns cultivos, tipos de gañado ou especies forestais e en zonas determinadas, índices de rendemento neto reducidos, na xanela habilítanse filas adicionais en que, canda os ingresos, pode indicarse o índice específico aplicable cando sexa distinto do xeral.

Nas actividades agrícolas deberá ter en conta a distinción que aparece en pantalla entre ingresos procedentes de cultivos en terras propias e en terras arrendadas.

Cando non sexa posible delimitar os devanditos ingresos ratearase en función da porcentaxe que supoñan as terras arrendadas dedicadas a cada cultivo con respecto á superficie total, propia ou arrendada, dedicada a ese cultivo.

Cando teña dereito aos índices correctores por agricultura ecolóxica e / ou cultivos en terra de regadío que utilicen enerxía eléctrica deberase delimitar, por cada tipo de produto, e en función de que os ingresos procedan de cultivos en terras propias ou/e en terras arrendadas, ou do tipo de explotación gandeira, os seguintes datos a partir do rendemento neto:

1. Parte do rendemento neto resultante que procede de agricultura ecolóxica.

2. Parte do rendemento neto resultante que procede de terras de regadío que utilice enerxía eléctrica.

3. Parte do rendemento neto resultante que proceda de ambas as dúas circunstancias, de agricultura ecolóxica e a un tempo utilice enerxía eléctrica para o seu regadío.

Cómputo dos ingresos

Actividades de transformación, elaboración ou manufactura

Farase constar como ingreso o valor dos produtos naturais, vexetais ou animais, utilizados no correspondente proceso produtivo, de acordo cos prezos de mercado dos mesmos no momento da súa incorporación ao devandito proceso. Así mesmo, incluiranse, se é o caso, os ingresos correspondentes ao autoconsumo, subvencións e indemnizacións nos termos que se comentan máis adiante.

Se durante o ano se transmitisen produtos elaborados en exercicios anteriores a 1998, deberá incluírse como ingreso deste exercicio o valor dos produtos naturais utilizados no proceso produtivo, de acordo cos prezos de mercado dos mesmos no momento da súa incorporación aos procesos de transformación, elaboración ou manufactura.

Resto de actividades

Comprende a totalidade dos ingresos íntegros, tanto se son en diñeiro como en especie, derivados da entrega dos produtos que constitúan o obxecto da actividade, así como, se é o caso, os procedentes da prestación de traballos e servizos accesorios á actividade principal incluíndo se é o caso o autoconsumo, as subvencións e as indemnizacións.

Cando medie contraprestación e esta sexa notoriamente inferior ao valor normal no mercado dos bens vendidos e dos servizos prestados, a valoración dos mesmos efectuarase polo seu valor normal no mercado.

Nas operacións económicas realizadas cunha sociedade coa que se dean relacións de vinculación o titular da actividade deberá efectuar de forma imperativa a súa valoración polo valor normal de mercado. Entenderase por valor normal de mercado aquel que se acordaría por persoas ou entidades independentes en condicións de libre competencia.

• Consideración das compensacións ou das cotas repercutidas do IVE

  • Tratandose de actividades incluídas no réxime especial da agricultura, gandaría e pesca do citado imposto, as compensacións percibidas deberán incluírse entre os correspondentes ingresos derivados das vendas ou procedentes das prestacións de traballos ou servizos.

  • Se a actividade está acollida ao réxime simplificado do IVE o importe das cotas repercutidas non se computará como ingreso. 

• Autoconsumo: Comprende tanto as entregas de bens e prestacións de servizos cuxo destino sexa o uso ou consumo particular do titular da actividade ou dos restantes membros da súa unidade familiar como as entregas de bens ou prestacións de servizos realizados a outras persoas de forma gratuíta. En ambos os dous casos, a valoración destas operacións deberá efectuarse polo valor normal de mercado dos dos bens ou servizos cedidos, ou que fosen obxecto de autoconsumo.

• Subvencións de capital: Son as concedidas para favorecer o establecemento da actividade ou a realización de investimentos en inmobilizado. Impútanse como ingreso en proporción á depreciación experimentada no exercicio (amortización) polos activos financiados coas devanditas subvencións. No caso de activos non depreciables, a subvención imputarase ao resultado do exercicio en que se produza o alleamento ou baixa no inventario dos mesmos, con aplicación da redución do 30 por100 por ser considerados regulamentariamente como rendementos obtidos de forma notoriamente irregular no tempo.

• Subvencións correntes: Son as concedidas, en xeral, para asegurar unha rendibilidade mínima ou compensar perdas ocasionadas na actividade. Impútanse integramente como ingreso no período en que se devindiquen.

• As subvencións que se concedan para financiar gastos específicos: impútanse como ingresos no mesmo exercicio en que se devindiquen os gastos que estean financiando

Amortización

Ao obxecto de aplicar correctamente os índices correctores sobre o rendemento neto previo que corresponda a cada tipo de explotación, para as claves de actividade "1. Agrícola e gandeira susceptible de estar incluída no R .E. da . G. e P. do IVE ", "3. Gandaría independente" e "7. Aproveitamentos que correspondan ao cedente en actividades agrícolas en réxime de parzaría", deberá diferenciarse, a través dunha xanela de captura de datos, as cantidades deducibles no exercicio en concepto de amortización, segundo a parte que razoablemente se atribúa aos distintos cultivos e explotacións (ou servizos que se presten), de acordo co seguinte detalle:

1. Elementos utilizados en actividades agrícolas: indicarase o importe da amortización do inmobilizado vinculado ás actividades agrícolas desenvolvidas polo contribuínte, distinguindo, pola súa parte, a parte que corresponda a cultivos en terras propias e en terras arrendadas.

2. Elementos utilizados en actividades gandeiras: indicarase o importe da amortización do inmobilizado vinculado ás explotacións gandeiras desenvolvidas polo contribuínte, distinguindo, pola súa parte, a parte que corresponda a explotacións intensivas de gañado porcino de carne e á avicultura do resto das explotacións gandeiras que, se é o caso, realícense.

3. Elementos utilizados en traballos e servizos accesorios: indicarase o importe da amortización do inmobilizado vinculado aos traballos e servizos accesorios prestados polo agricultor ou gandeiro.

Nas actividades forestais non se practican amortizacións.