8.2.2.1. Importe das ganancias e perdas patrimoniais

O importe das ganancias ou perdas patrimoniais será:

1. No suposto de transmisión onerosa ou lucrativa, a diferenza entre o  valor de adquisición e o  valor de transmisión dos elementos patrimoniais.

2. Nos demais supostos, o valor de mercado dos elementos patrimoniais ou partes proporcionais, se é o caso.

Se se efectuasen melloras nos elementos patrimoniais transmitidos, distinguirase a parte do valor de alleamento que corresponda a cada compoñente do mesmo.

Valor de adquisición (art. 35 e 36 Lei)

O valor de adquisición estará formado pola suma dos seguintes conceptos:

1. O importe real polo que a devandita adquisición se efectuar.

   Cando a adquisición for a título lucrativo tomarase por importe real o que resulte da aplicación das normas do Imposto sobre Sucesións e Doazóns (art. 36 Lei) sen que poida exceder do valor de mercado.

   Non obstante, nas adquisicións lucrativas por causa de morte derivada de contratos ou pactos sucesorios con efectos de presente, o beneficiario dos mesmos que transmitise, antes do transcurso de cinco anos desde a celebración do pacto sucesorio ou do falecemento do causante, se fóra anterior, os bens adquiridos, subrogarase na posición deste , con respecto ao valor e data de adquisición daqueles , cando este valor fóra inferior ao previsto no parágrafo anterior.

   O que se dispón no parágrafo anterior só será aplicable ás  transmisións  de bens efectuados con posterioridade ao 11 de xullo de 2021 que fosen adquiridos de forma lucrativa por causa de morte en virtude de contratos ou pactos sucesorios con efectos de presente.

   Nas adquisicións lucrativas de empresas ou participacións ás que se refire o apartado 6 do artigo 20 da Lei 29/1987, do 28 de decembro, do Imposto sobre Sucesións e Doazóns, o donatario subrogarase na posición do doador respecto dos valores e datas de adquisición dos devanditos bens (art. 36 Lei).

2. O custo dos investimentos e melloras efectuadas nos bens adquiridos e os gastos e tributos inherentes á adquisición, excluídos os intereses, que fosen satisfeitos polo adquirente.

O  valor obtido conforme ao exposto anteriormente minorarase no importe das amortizacións  fiscalmennte deducibles, computandose en todo caso a amortización mínima, con independencia da efectiva consideración desta como gasto.

Con esta finalidade, considerarase como amortización mínima a resultante do período máximo de amortización ou a porcentaxe fixa que corresponda, segundo cada caso.

Unicamente poderá minorarse a amortización cando se trate da transmisión de elementos patrimoniais polos que puidese computarse como gasto deducible, é dicir, fundamentalmente nos seguintes supostos:

• Transmisión de bens inmobles que estean ou estivesen arrendados (e, se é o caso, cos mobles entregados conxuntamente con eles).

• Transmisión de elementos patrimoniais que estean ou estivesen afectos a unha actividade económica desenvolvida polo contribuínte

• Transmisión de bens mobles, negocios ou minas que estean ou estivesen arrendados.

Non debe computarse amortización no suposto de bens inmobles non arrendados, ou outros elementos patrimoniais distintos dos sinalados anteriormente, en que non fose deducible fiscalmente cantidade algunha en concepto de amortización.

Valor de transmisión (art. 35.3 Lei)

O valor de transmisión será o importe real polo que o alleamento se efectuase.

Por importe real do valor de alleamento tomarase o efectivamente satisfeito, sempre que non resulte inferior ao normal de mercado, en cuxo caso prevalecerá este.

Deste valor deduciranse os gastos e tributos inherentes á transmisión en canto resulten satisfeitos polo transmitente.

Cando a transmisión for a título lucrativo tomarase por importe real o que resulte da aplicación das normas do Imposto sobre Sucesións e Doazóns