8.4.2.6. Achegas anuais máximas e límite de redución

Achegas anuais máximas con dereito a redución

• Con carácter xeral.

  O conxunto das achegas anuais máximas que poden dar dereito a reducir a base impoñible, incluíndo, se é o caso, as que fosen imputadas polos promotores, non poderá exceder de 2000 euros.

  Este límite incrementarase en 8.000 euros, sempre que tal incremento proveña de contribucións empresariais.

  As achegas propias que o empresario individual realice a plans de pensións de emprego de que, pola súa parte, sexa promotor e partícipe, consideraranse como contribucións empresariais, para os efectos do cómputo deste límite .

• No caso dos seguros colectivos de dependencia as primas satisfeitas pola empresa en virtude destes contratos de seguro e imputadas ao traballador terán un límite de redución propio e independente de 5.000 euros anuais.

Límite de redución 

Como límite máximo conxunto para as reducións anteriores, aplicarase a menor das cantidades seguintes:

• O 30% da suma dos rendementos netos do traballo e de actividades económicas percibidos individualmente no exercicio.

• 2000 euros anuais.

  Este límite incrementarase en 8.000 euros, sempre que tal incremento proveña de contribucións empresariais.

  As achegas propias que o empresario individual realice a plans de pensións de emprego ou a mutualidades de previsión social, de que, pola súa parte, sexa promotor e partícipe ou mutualista, así como as que realice a plans de previsión social empresarial ou seguros colectivos de dependencia de que, pola súa parte, sexa tomador e asegurado, consideraranse como contribucións empresariais, para os efectos do cómputo deste límite.

  E, adicionalmente, 5.000 euros anuais para as primas a seguros colectivos de dependencia satisfeita pola empresa.

A imputación do exceso realizarase respectando os límites establecidos na Lei do Imposto.

Con esta finalidade, cando no período impositivo en que se produza o devandito exceso concorran achegas do contribuínte e contribucións imputadas polo promotor, a determinación da parte do exceso que corresponde a unhas e outras realizarase en proporción aos importes das respectivas achegas e contribucións.

Cando concorran achegas realizadas no exercicio con achegas de exercicios anteriores que non puidesen ser obxecto de redución por insuficiencia de base impoñible ou por exceder do límite porcentual entenderanse reducidas, en primeiro lugar, as achegas correspondentes a anos anteriores.

Solicitude de redución 

Os partícipes, mutualistas ou asegurados poderán solicitar que as cantidades achegadas, con inclusión se é o caso, das contribucións do promotor que lles fosen imputadas, que non puidesen ser obxecto de redución na base impoñible por insuficiencia da mesma ou por aplicación do límite porcentual, séxano nos cinco exercicios seguintes.

Esta regra non será de aplicación ao exceso sobre os límites de achegas establecidas na lei.

A solicitude deberá realizarse na declaración do Imposto sobre a Renda das Persoas Físicas correspondente ao exercicio en que as achegas realizadas non puidesen ser obxecto de redución.