Por actividades de investigación e desenvolvemento e innovación tecnolóxica

• Por gastos e investimentos en actividades de investigación e desenvolvemento (art.35 LIS)

  • Porcentaxes de dedución

    A realización de actividades de investigación e desenvolvemento dará dereito a practicar unha dedución da cota íntegra do 25 %dos gastos efectuados no período impositivo por este concepto.

    No caso de que os gastos efectuados na realización de actividades de investigación e desenvolvemento no período impositivo sexan maiores que a media dos efectuados nos dous anos anteriores, aplicarase o 25% ata a devandita media, e o 42% sobre o exceso respecto da mesma.

    Ademais da dedución que proceda conforme ao que se dispón nos parágrafos anteriores, practicarase unha dedución adicional do 17 %do importe dos gastos de persoal correspondentes a investigadores cualificados adscritos en exclusiva a actividades de investigación e desenvolvemento.

    Polos investimentos en elementos de inmobilizado material e intanxible, excluídos os inmobles ou terreos, sempre que estean afectos exclusivamente ás actividades de investigación e desenvolvemento, darán dereito a unha dedución do 8 %

    Os elementos en que se materialice o investimento deberán permanecer no patrimonio do contribuínte, agás perdas xustificadas, ata que se cumpra a súa finalidade específica nas actividades de investigación e desenvolvemento, agás que a súa vida útil fóra inferior.

  • Base da dedución

    A base da dedución estará constituída polo importe dos gastos de investigación e desenvolvemento e, se for o caso, polos investimentos en elementos de inmobilizado material e intanxible excluídos os edificios e terreos.

    Serán considerados gastos de investigación e desenvolvemento os realizados polo contribuínte, incluídas as amortizacións dos bens afectos ás citadas actividades, cando estean directamente relacionados coas referidas actividades e se apliquen efectivamente á realización destas, constando especificamente individualizados por proxectos.

    A base da dedución minorarase no importe das subvencións recibidas para o fomento das devanditas actividades e imputables como ingreso no período impositivo.

    Os gastos de investigación e desenvolvemento que integran a base da dedución deben corresponder a actividades efectuadas en España ou en calquera Estado membro da Unión Europea ou do Espazo Económico Europeo.

    Igualmente terán a consideración de gastos de investigación e desenvolvemento as cantidades pagas para a realización das devanditas actividades en España ou en calquera Estado membro da Unión Europea ou do Espazo Económico Europeo, por encargo do contribuínte, individualmente ou en colaboración con outras entidades.

    Os investimentos serán considerados realizados cando os elementos patrimoniais sexan postos en condicións de funcionamento.

• Por gastos en actividades de innovación tecnolóxica (art.35 LIS)

  • Porcentaxe de dedución

    A realización de actividades de innovación tecnolóxica dará dereito a practicar unha dedución do 12 %.

    Non obstante, para os gastos efectuados en proxectos iniciados a partir do 25 de xuño de 2020 consistentes na realización de actividades de innovación tecnolóxica cuxo resultado sexa un avance tecnolóxico na obtención de novos procesos de produción na cadea de valor da industria da automoción ou melloras substanciais dos xa existentes, establécese un incremento da dedución en 38 puntos porcentuais (ata o 50% dos estes gastos) sempre que os contribuíntes teñan a consideración de pequenas e medianas empresas de acordo co que se dispón no anexo I do Regulamento (UE) n.º 651/2014 da Comisión, do 17 de xuño de 2014; para o resto de contribuíntes o incremento será de tres puntos porcentuais.

  • Base de dedución

    A base da dedución estará constituída polo importe dos gastos do período en actividades de innovación tecnolóxica que correspondan aos seguintes conceptos:

    1. Actividades de diagnóstico tecnolóxico tendentes á identificación, a definición e a orientación de solucións tecnolóxicas avanzadas, con independencia dos resultados en que culminen.

    2. Deseño industrial e enxeñaría de procesos de produción, que incluirán a concepción e a elaboración dos planos, debuxos e soportes destinados a definir os elementos descritivos, especificacións técnicas e características de funcionamento necesario para a fabricación, proba, instalación e utilización dun produto, así como a elaboración de mostrarios téxtiles, da industria do calzado, do curtido, da marroquinaría, do xoguete do moble e da madeira.

    3. Adquisición de tecnoloxía avanzada en forma de patentes, licenzas, «know-how» e deseños. Non darán dereito á dedución as cantidades satisfeitas a persoas ou entidades vinculadas ao suxeito pasivo. A base correspondente a este concepto non poderá superar a contía dun millón de euros anuais.

    4. Obtención do certificado de cumprimento das normas de aseguramento da calidade na serie ISO 9000, GMP ou similares, sen incluír aqueles gastos correspondentes á implantación das devanditas normas.

    Os gastos deben corresponder a actividades efectuadas en España ou en calquera Estado membro da Unión Europea ou do Espazo Económico Europeo. Igualmente, terán a consideración de gastos de innovación tecnolóxica as cantidades pagas para a realización das devanditas actividades en España ou en calquera Estado membro da Unión Europea ou do Espazo Económico Europeo, por encargo do suxeito pasivo, individualmente ou en colaboración con outras entidades.

    Para determinar a base da dedución o importe dos gastos en actividades de innovación tecnolóxica minorarase no importe das subvencións recibidas para o fomento das devanditas actividades e imputables como ingreso no período impositivo.