10.15.32. Polo incremento dos custos do financiamento alleo no investimento da vivenda habitual

Esta dedución non resulta aplicable no caso de contribuíntes falecidos antes do 28 de outubro.

Contía

O 50 % da diferenza positiva entre as cantidades abonadas durante o período impositivo e as satisfeitas durante o ano anterior co límite de 100 euros.

No suposto de que o préstamo fose constituído durante o ano natural anterior ao período impositivo, os intereses satisfeitos durante ese ano restaranse do resultado de ratear o importe dos intereses satisfeitos durante o período impositivo polo cociente derivado de dividir entre 360 o número de días transcorridos desde o día seguinte á data da concesión do préstamo e o último día de ano de concesión, sen que poida resultar deste cálculo un importe superior aos efectivamente satisfeitos neste exercicio.

Requisitos e condicións

• Que os intereses satisfeitos deriven de préstamos  constituídos para a adquisición ou rehabilitación da vivenda que constitúa ou vaia a constituír a súa residencia habitual, ou para a adecuación desta por razón de discapacidade.

• Que o contribuínte non aplicase a dedución estatal por investimento en vivenda habitual.

• Os conceptos de vivenda habitual e de adquisición, rehabilitación e adecuación por razón de discapacidade da vivenda habitual serán os recollidos na normativa estatal reguladora do imposto.

• A suma da base liquidable xeral e da base liquidable do aforro do contribuínte non sexa superior a 30.000 euros, en tributación individual, ou a 47.000 euros, en tributación conxunta. Este requisito será controlado polo programa.

Límite

O importe íntegro da dedución soa será aplicable aos contribuíntes cuxa suma da base liquidable xeral e da base liquidable do aforro sexa inferior a 27.000 euros en tributación individual, ou inferior a 44.000 euros, en tributación conxunta.

Cando a suma da base liquidable xeral e da base liquidable do aforro estea comprendida entre 27.000 e 30.000 euros en tributación individual, ou entre 44.000 e 47.000 euros en tributación conxunta, os importes e límites de dedución serán os seguintes:

1. En tributación individual o resultado de multiplicar o importe ou límite de dedución por unha porcentaxe obtida da aplicación da seguinte fórmula: 100 X (1 – o coeficiente resultante de dividir por 3.000 a diferenza entre a suma da base liquidable xeral e do aforro do contribuínte e 27.000)

2. En tributación conxunta, o resultado de multiplicar o importe ou límite de dedución por unha porcentaxe obtida da aplicación da seguinte fórmula: 100 X (1 – o coeficiente resultante de dividir por 3.000 a diferenza entre a suma da base liquidable xeral e do aforro do contribuínte e 44.000)

Formalización

Reflectirá o importe dos intereses  satisfeitos en 2022 e en 2021.

No caso de que o préstamo se constituíse en 2021 indicará a data.