8.7.5.1 Gastos de custodia en gardaría ou centros de educación infantil

A dedución por maternidade ten un incremento adicional de ata 1.000 euros anuais cando o contribuínte, que teña dereito á dedución por maternidade satisfaga gastos de custodia en gardaría ou centros de educación infantil autorizados por fillo menor de tres anos.

Teña en conta que para os períodos impositivos 2020, 2021 e 2022, entenderase que continúan realizando unha actividade por conta propia ou allea pola que están dadas de alta na Seguridade Social ou mutualidade as mulleres que a partir do 1 de xaneiro de 2020 pasasen a estar nalgunha das seguintes situacións:

1. Traballadoras por conta allea que pasen a situación legal de desemprego por:

   • Quedar suspendido o seu contrato de traballo. Esta situación prodúcese nos seguintes casos: ERTE con suspensión total e vítimas de violencia de xénero.

   • Encontrarse nun período de inactividade produtiva das traballadoras fixas-discontinuas.

2. Traballadoras por conta propia que pasen a percibir a prestación por cesamento de actividade como consecuencia da suspensión da actividade económica desenvolvida.

Non obstante, no exercicio en que o fillo menor cumpra tres anos, este incremento pode ser de aplicación respecto dos gastos incorridos con posterioridade ao cumprimento da devandita idade ata o mes anterior en que poida comezar o segundo ciclo de educación infantil.

Se ambos os dous proxenitores son do mesmo sexo e os dous teñen dereito á dedución de maternidade por gastos de gardaría o importe ratearase entre eles en cada un dos meses en que ambos os dous teñan dereito. Se, pola contra, nalgún mes só un cumpre os requisitos, unicamente este terá dereito á aplicación da dedución no devandito mes.

Considéranse gastos de custodia as cantidades que cumpran os seguintes requisitos:

• Sean satisfeito a gardarías ou centros de educación infantil autorizados. A dedución por maternidade é unha medida vinculada ao ámbito educativo (primeiro ciclo de educación infantil), polo que a súa aplicación se refire a centros de educación infantil, públicos ou privados, que desenvolven o referido ciclo e en consecuencia que estean autorizados pola Administración educativa competente.

• Abóense pola preinscrición ou matrícula, a asistencia, en horario xeral ou ampliado, e a alimentación, sempre que se producisen por meses completos.

• Que non teñan para o contribuínte a consideración de rendementos do traballo en especie exenta.

Este incremento da dedución por maternidade  terá como límite para cada fillo:

• As cotizacións e cotas totais á Seguridade Social e Mutualidades reportadas en cada período impositivo con posterioridade ao nacemento ou adopción.

  Con esta finalidade, computaranse as cotizacións e cotas polos seus importes íntegros, sen ter en consideración as bonificacións que puidese corresponder.

• O importe anual total do gasto efectivo non subvencionado satisfeito en cada período impositivo á gardaría ou centro educativo en relacción con este fillo.

• Se ambos os dous proxenitores son do mesmo sexo a dedución terá como límite para cada proxenitor, con independencia de que se opte por tributación individual ou conxunta, a menor das seguintes cantidades: o importe das súas propias cotizacións á Seguridade Social ou Mutualidade no período impositivo ou a suma da metade dos gastos efectivos non subvencionados (con independencia do proxenitor que os pague) abonados á gardaría nos meses en que ambos os dous proxenitores tivesen dereito ao devandito incremento máis a totalidade dos gastos efectivos non subvencionados (con independencia do proxenitor que os pague) nos meses en que só o proxenitor en cuestión tivese dereito ao incremento.

Este incremento consígnase na declaración do IRPF de cada exercicio e non existe posibilidade do seu pagamento anticipado.