10.1.8. Por asistencia a persoas con discapacidade

Contía 

1. Os contribuíntes que teñan dereito á aplicación do mínimo por discapacidade de descendentes ou ascendentes poderán deducirse  100 euros por persoa con discapacidade cando a suma das bases impoñibles xerais e do aforro non sexa superior a 80.000 euros, en tributación individual, ou a 100.000 euros en caso de tributación conxunta.

   A consideración de persoa con discapacidade é a fixada pola normativa estatal do IRPF.

   Cando varios contribuíntes teñan dereito á aplicación desta dedución estarase ás regras do rateo, convivencia e demais límites previstos na normativa estatal do IRPF.

2. Cando se acredite que as persoas con discapacidade necesitan axuda de terceiras persoas e xeren dereito á aplicación do mínimo en concepto de gastos de asistencia, o contribuínte poderá deducirse a cantidade resultante de aplicar o 20% do importe satisfeito á Seguridade Social, en concepto de cota fixa que sexa por conta do empregador ou empregadora, de conformidade co que se establece no Sistema Especial do Réxime Xeral da Seguridade Social de Empregados do Fogar, co límite de 500 euros anuais por contribuínte.

   Só terá dereito a esta dedución o contribuínte titular do fogar familiar que conste como tal na Tesourería Xeral da Seguridade Social, pola afiliación en Andalucía ao Sistema Especial do Réxime Xeral da Seguridade Social de Empregados do Fogar, de acordo co previsto na normativa de aplicación.

   Esta dedución será incompatible coa dedución "Por axuda doméstica" cando sexa a mesma persoa empregada a que dá dereito á aplicación de ambas as dúas deducións.

Formalización

• Dedución aplicable con carácter xeral:

  O programa xerará a dedución de 100 euros por cada ascendente ou descendente con discapacidade que cumpra os requisitos citados.

• Se precisa de axuda de terceiras persoas:

  No suposto de que a persoa con discapacidade necesite axuda de terceiras persoas deberá indicar na xanela de captura de datos a seguinte información:

  • As cantidades satisfeitas no período impositivo en concepto de cota fixa  que sexa por conta do empregador ou empregadora, de conformidade co que se establece no Sistema Especial do Réxime Xeral da Seguridade Social de Empregados do Fogar.

  • O Código de Conta de Cotización do empregador.