10.11.20. Por adquisición e rehabilitación de vivendas nos proxectos de aldeas modelo

Contía

O 15% das cantidades satisfeitas no exercicio para a adquisición ou rehabilitación de vivendas.

Requisitos

A vivenda tivose que adquirir e as obras tivéronse que iniciar a partir do 1 de xaneiro de 2021.
As vivendas teñen que estar situadas en terreos que se integren en proxectos de aldeas modelo, de conformidade co previsto na Lei 11/2021, do 14 de maio, de recuperación da terra agraria de Galicia.
As vivendas débense destinar a residencia dos contribuíntes que as adquiran ou rehabiliten, xa sexa con carácter habitual ou esporádico.

Polo tanto, a dedución non será aplicable cando a vivenda estea alugada aínda que o alugamento sexa só durante unha parte do ano.

Base da dedución

A base desta dedución non poderá exceder de 9.000 euros anuais para o caso de construcións destinadas a constituír a vivenda habitual dos contribuíntes. Noutro caso, a base da dedución non poderá exceder de 4.500 euros anuais.

A base da dedución estará constituída polas cantidades satisfeitas para a adquisición ou rehabilitación da vivenda, incluídos os gastos orixinados que corresen a cargo do adquirente, e, no caso de financiamento alleo, a amortización, os intereses, o custo dos instrumentos de cobertura do risco de tipo de xuro variable dos préstamos hipotecarios regulados no artigo décimo noveno da Lei 36/2003, do 11 de novembro, de medidas de reforma económica, e demais gastos dela derivados.

En caso de aplicación dos citados instrumentos de cobertura, os intereses satisfeitos polo contribuínte rebaixaranse nas cantidades obtidas pola aplicación do citado instrumento.

Obras de rehabilitación

Aos efectos da presente dedución, terán a consideración de obras de rehabilitación aquelas que cumpran os seguintes requisitos:

Que dispoñan dos permisos e autorizacións administrativas correspondentes.
Que teñan por obxecto principal a reconstrución da vivenda mediante a consolidación e o tratamento das estruturas, fachadas ou cubertas e outras obras análogas, sempre que o custo global das operacións de rehabilitación exceda do 25 %do prezo de adquisición, se se efectuou esta durante os dous anos inmediatamente anteriores ao inicio das obras de rehabilitación, ou, noutro caso, do valor de mercado que teña o inmoble no momento do devandito inicio.

Con esta finalidade, descontarase do prezo de adquisición ou do valor de mercado do inmoble a parte proporcional correspondente ao chan. Cando non se coñeza o valor do solo, este calcularase rateando o custo de adquisición satisfeito ou o valor de mercado entre os valores catastrais do solo e da construción de cada ano.

Incompatibilidades

Esta dedución é incompatible, para os mesmos investimentos, coa dedución por investimento en instalacións de climatización e / ou auga quente sanitaria que empreguen enerxías renovables na vivenda habitual e destinada exclusivamente ao autoconsumo e coa dedución por obras de mellora de eficiencia enerxética en edificios de vivendas ou en vivendas unifamiliares.

Formalización

Reflectirá o importe do investimento con dereito a dedución e indicará se é ou vai ser a súa vivenda habitual.