10.13.8. Por gastos de material escolar e libros de texto

Contía

Os contribuíntes poderán aplicar unha dedución de 120 euros, por cada descendente, pola adquisición de material escolar e libros de texto derivado da escolarización dos seus descendentes no segundo ciclo de educación infantil, educación primaria e educación secundaria obrigatoria.

Requisitos

• Se os contribuíntes non forman parte dunha unidade familiar que teña a condición legal de familia numerosa:

  1. En declaración individual a suma da base impoñible xeral e da base impoñible do aforro non pode superar os 20.000 euros.

  2. En declaración conxunta a suma da base impoñible xeral e da base impoñible do aforro non pode superar os 40.000 euros.

• Se os contribuíntes forman parte dunha unidade familiar que teña a condición legal de familia numerosa:

  • En declaración individual a suma da base impoñible xeral e da base impoñible do aforro non pode superar os 33.000 euros.

  • En declaración conxunta a suma da base impoñible xeral e da base impoñible do aforro non pode superar os 53.000 euros.

• A dedución corresponderá ao ascendente que satisfixese as cantidades destinadas á adquisición dos libros de texto e do material escolar.

  Cando exista máis dun contribuínte con dereito á aplicación da dedución o importe ratearase por partes iguais na declaración de cada un deles .

  No caso de matrimonio, e en declaracións individuais, se un dos contribuíntes con dereito á dedución non presenta declaración por non estar obrigado, o outro, se cumpre os requisitos, poderá aplicar a dedución na súa totalidade.

• Só se terán en conta aos descendentes que dean dereito á aplicación do mínimo por descendentes.

• O importe da dedución deberá minorarse, por cada descendente, na cantidade correspondente ás bolsas e axudas obtidas no período impositivo procedente de calquera Administración Pública, que cubra a totalidade ou parte dos gastos por adquisición de material escolar ou libros de texto.

Formalización

Deberá indicar nos recadros habilitados para ese fin os seguintes datos diferenciados:

1. En caso de matrimonio, sempre que ambos os dous cónxuxes presenten declaración, indicará o número de descendentes que sendo comúns a ambos os dous orixinan o dereito á dedución.

   A continuación deberá indicar o importe total das bolsas ou axudas percibidas para a adquisición de libros de texto e material escolar que corresponden a ambos os dous cónxuxes.

2. Noutro caso, ou cando existindo matrimonio optase por unha captura de datos individual, deberá reflectir, en primeiro lugar, o número de fillos que orixinan o dereito á dedución, diferenciando os que dan dereito a deducir unicamente ao titular da declaración de que dan dereito a deducir ao titular e a outro contribuínte, reflectindo, nos dous casos, as cantidades totais de bolsas ou axudas públicas que correspondan á adquisición de libros de texto e material escolar.

3. Deberá indicar, se é o caso, marcando o recadro correspondente se forma parte dunha familia numerosa.