10.6.15. Por investimentos ou doazóns a entidades da Economía Social establecida en Cantabria

Contía

• O 20 % das cantidades investidas durante o exercicio nas achegas realizadas coa finalidade de ser socio en entidades que formen parte da Economía Social a que se refire o apartado seguinte.

• O 50 % das cantidades doadas, con carácter irrevogable, a entidades que formen parte da Economía social para o desenvolvemento de actividades económicas tanto novas como de afianzamento das xa realizadas.

• O 25 % das cantidades doadas, con carácter irrevogable, a entidades que formen parte da Economía social para a realización de actividades de fomento e difusión da Economía social, nos termos previstos no artigo 8 da Lei 5/2011, do 29 de marzo, de Economía Social (BOE do 30).

Límites

O límite conxunto para os tres supostos de dedución é de 3.000 euros, tanto en tributación individual coma en tributación conxunta. Ningunha cantidade poida ser obxecto de dedución simultaneamente en dous ou máis das modalidades desta dedución.

Requisitos e condicións

1. A aplicación desta dedución está suxeita ao cumprimento dos requisitos e condicións:

   • A participación acadada polo contribuínte canda as do cónxuxe ou persoas unidas por razón de parentesco, en liña directa ou colateral, por consanguinidade ou afinidade ata o terceiro grao incluído, non poderá ser superior ao 40 %do capital da entidade obxecto do investimento ou doazón.

   • A entidade en que debe materializarse o investimento ou doazón terá que cumprir os seguintes requisitos:

     • Formar parte da economía social nos termos previstos na Lei 5/2011, do 29 de marzo, de Economía Social e estar inscrita nos rexistros ou catálogos establecidos que recoñezan a condición de entidade de economía social.

     • Ter o seu domicilio social e fiscal en Cantabria.

     • Contar, en termo medio anual, cunha persoa ocupada con contrato laboral e a xornada completa, e dada de alta no réxime xeral da Seguridade Social.

     Estes requisitos deberán cumprirse durante un período mínimo de tres anos contado desde a achega ou doazón

2. As operacións en que sexa de aplicación a dedución deberán formalizarse en escritura pública, en que se fará constar a identidade dos investidores e o importe do investimento respectivo.

3. Para ter dereito a esta dedución débese acreditar a efectividade da doazón e o valor da mesma mediante certificación emitida pola entidade donataria.

4. As entregas ou doazóns que forman a base desta dedución deberán realizarse mediante tarxeta de crédito ou débito, transferencia bancaria, cheque nominativo ou ingreso en contas en entidades de crédito, ás entidades que reciban a doazón.

   En ningún caso darán dereito a practicar esta dedución as achegas ou doazóns satisfeitas mediante entregas de diñeiro en efectivo.

5. Na primeira modalidade de dedución (20 %) a participación no capital adquirido como consecuencia do investimento realizado, terá que manterse no réxime de patrimonio do contribuínte durante un período mínimo de cinco anos.

O incumprimento dos requisitos e condicións establecidas nos apartados anteriores comportará a perda do beneficio fiscal e, en tal caso, o contribuínte deberá incluír na declaración do imposto correspondente ao exercicio en que se producise o incumprimento a parte do imposto que se deixase de pagar como consecuencia da dedución practicada, canda os xuros de mora reportados.

Incompatibilidade

Esta dedución será incompatible, para os mesmos investimentos, coas deducións “Por donativos a fundacións ou ao Fondo Cantabria Coopera.” e “Dedución por investimento na adquisición de accións e participacións sociais de novas entidades ou de recente creación”.

Formalización

Reflectirá o NIF da entidade e o importe do investimento con dereito á dedución.

O programa trasladará os datos ao Anexo B.8 da declaración.