10.4.12. Por arrendamento de vivenda habitual

Contía

Os contribuíntes menores de 36 anos, e tamén os maiores de 65 anos que non exerzan ningunha actividade laboral ou profesional poderán deducir o 15% dos importes satisfeitos no período impositivo polo arrendamento dunha vivenda habitual no territorio das Illes Balears cun máximo de 530 euros anuais.

A porcentaxe será do 20% dos importes satisfeitos no período impositivo cun máximo de 650 euros anuais cando o arrendamento se realice por:

Contribuíntes menores de 30 anos.
Contribuíntes que teñan recoñecido un grao de discapacidade igual ou superior ao 33 %.
Contribuíntes que teñan dereito ao mínimo por discapacidade de ascendentes ou descendentes.
O pai, a nai ou os pais que convivan co fillo ou os fillos sometidos á patria potestade e que integren unha familia numerosa, ou unha familia monoparental con dous ou máis fillos ou fillas.
Traballador autónomo que estea de alta no réxime especial de traballadores autónomos ou por conta propia da Seguridade Social que corresponda un mínimo de 183 días ao longo do período impositivo. (Este suposto non resulta aplicable aos contribuíntes falecidos antes do 25 de xullo).

A dedución aplicarase polo titular ou os titulares dos contratos de arrendamento. As cantidades satisfeitas polo cónxuxe, que non figure no contrato, non darán dereito á dedución.

Requisitos

Que se trate do arrendamento da vivenda habitual do contribuínte, ocupada efectivamente por este, e que a duración do contrato de arrendamento sexa igual ou superior a un ano.
Que, durante polo menos a metade do período impositivo, nin o contribuínte nin ningún dos membros da súa unidade familiar sexan titulares, do pleno dominio ou dun dereito real de uso ou gozo, doutra vivenda distante a menos de 70 quilómetros da vivenda arrendada, agás nos casos en que a outra vivenda estea situada fóra das Illes Balears ou noutra illa, ou xere, polo contribuínte ou o resto de membros da súa unidade familiar, rendementos do capital inmobiliario durante o mesmo período impositivo.

En caso de tributación individual o requisito de non disposición deberá cumprirse no contribuínte; no caso de tributación conxunta deberá cumprirse en calquera dos membros da unidade familiar.
Que o contribuínte non teña dereito no mesmo período impositivo a ningunha dedución por investimento en vivenda habitual, aínda que non o aplique.
Base impoñible:
- Con carácter xeral: a base impoñible total non poderá superar os 33.000 euros no caso de tributación individual e os 52.800 euros no de tributación conxunta.
  
  No suposto de familias numerosas de categoría xeral ou monoparental con dous ou máis fillos ou fillas. a base impoñible total do contribuínte non poderá superar os 39.600 euros no caso de tributación individual e os 63.360 euros no de tributación conxunta.
  
  No caso de familias numerosas de categoría especial a base impoñible total do contribuínte non poderá superar os 42.900 euros no caso de tributación individual e os 68.640 euros en tributación conxunta.
- Contribuíntes falecidos antes do 25 de xullo: a base impoñible total non poderá superar os 33.000 euros en tributación individual.
  
  Se o contribuínte formaba parte dunha familia numerosa ou monoparental a base impoñible total non poderá superar os 39.600 euros en tributación individual.

Formalización

Importe satisfeito pola persoa que consta como titular no contrato de arrendamento.

No caso de matrimonio se no contrato figura só un do cónxuxes será este o que poida aplicar a dedución. Se a renda se satisfai con fondos gananciais o cónxuxe titular do contrato poderá aplicar a dedución polo 50 %do importe do alugamento. As cantidades satisfeitas polo outro cónxuxe non dan dereito á dedución ao non ter a condición de arrendatario.
NIF do arrendador, se o arrendador non ten NIF deberá consignar o Número de Identificación no país de residencia.
Se o arrendamento é satisfeito por unha persoa que convive cos seus fillos sometidos a patria potestade formando unha familia numerosa de categoría xeral ou especial ou dunha familia monoparental con dous ou máis fillos ou fillas indicarao marcando o recadro que corresponda coa súa situación.
Se é maior de 65 anos e non exerce ningunha actividade laboral ou profesional indicarao marcando o recadro correspondente.
Se é un traballador autónomo que estivo no réxime especial de traballadores autónomos ou por conta propia da Seguridade Social polo menos 183 días no período impositivo marcará o recadro habilitado con esa fin.

O programa trasladará os datos ao anexo B.11 da declaración.