11.4.1.6 Deducións da cota íntegra

Os contribuíntes aos que sexa aplicable o réxime de transparencia fiscal internacional poderán deducir da cota íntegra:

1. Os impostos ou gravames de natureza idéntica ou análoga ao Imposto sobre Sociedades, efectivamente satisfeitos, na medida que corresponda coa renda positiva incluída na base impoñible.

   Nos impostos efectivamente satisfeitos inclúense os pagos pola entidade non residente e polas súas sociedades participadas en, polo menos, un 5 por 100.

2. O imposto ou gravame efectivamente satisfeito no estranxeiro por razón da distribución dos dividendos ou participacións en beneficios, na parte que corresponda coa renda positiva incluída con anterioridade na base impoñible.

   Cando a participación sobre a entidade non residente sexa indirecta a través doutra ou outras entidades non residentes, deducirán o imposto ou gravame de natureza idéntica ou análoga ao Imposto sobre Sociedades efectivamente satisfeito por aquela ou aquelas na parte que corresponda á renda positiva incluída con anterioridade na base impoñible.

   Estas deducións practicaranse aínda cando os impostos correspondan a períodos impositivos distintos a aquel en que se realizou a imputación.

En ningún caso serán deducibles os impostos ou gravames satisfeitos en territorios ou países cualificados regulamentariamente como paraísos fiscais.

A suma das deducións contempladas neste apartado non poderá exceder da cota íntegra que en España correspondería pagar pola renda positiva incluída na base impoñible.

O importe destas deducións deberá consignarse na clave [00575] da páxina 14 do modelo 200.