2.7.1.7 Entidade de tenza de valores estranxeiros

Esta clave será marcada por aquelas entidades que se acollan ao réxime das entidades de tenza de valores estranxeiros regulado no capítulo XIII do título VII da Lei do Imposto sobre Sociedades.

Poderán acollerse a este réxime as entidades cuxo obxecto social comprenda a actividade de xestión e administración de valores representativos dos fondos propios de entidades non residentes en territorio español, mediante a correspondente organización de medios materiais e persoais.

Os valores ou participacións representativas da participación no capital da entidade de tenza de valores estranxeiros deberán ser nominativos.

A opción polo réxime das entidades de tenza de valores estranxeiros deberá comunicarse á Axencia Estatal de Administración Tributaria. O réxime aplicarase ao período impositivo que finalice con posterioridade á devandita comunicación e aos sucesivos que conclúan antes de que se comunique á Axencia Estatal de Administración Tributaria a renuncia ao réxime.

Non poden acollerse a este réxime as entidades sometidas aos réximes especiais das agrupacións de interese económico, españolas e europeas, e de unións temporais de empresas e as entidades que teñan como actividade principal a xestión dun patrimonio mobiliario ou inmobiliario nos termos establecidos no apartado 2 do artigo 5 da LIS.