8.4.3.3 2019: Producións cinematográficas españolas (PC)

O artigo 36.1 da LIS establece que os contribuíntes poderán practicar a dedución por investimentos en producións cinematográficas respecto das producións españolas de longametraxes cinematográficas e de series audiovisuais de ficción, animación ou documental, que permitan a confección dun soporte físico previo á súa produción industrial seriada, sempre que teñan a consideración de produtor da obra.

A entidade declarante deberá consignar na clave [00807] (páxina 17 do modelo 200) a contía correspondente aos gastos realizados na produción e exhibición de espectá­culos en vivo de artes escénicas e musicais xerados no período impositivo e na clave [00808] o importe da dedución que é obxecto de aplicación na presente declaración.

Porcentaxes de dedución aplicable no exercicio 2019.

O produtor da obra poderá aplicar as seguintes porcentaxes de dedución:

• 25 por cento (20 por cento ata 31-01-2016) respecto do primeiro millón de base da dedución.

• 20 por cento (18 por cento ata 31-01-2016) sobre o exceso do devandito importe.

Base da dedución

A base da dedución estará constituída polo custo total da produción, así como polos gastos para a obtención de copias e os gastos de publicidade e promoción a cargo do produtor ata o límite para ambos os dous do 40 por cento do custo de produción.

Polo menos o 50 por cento da base da dedución deberá corresponderse con gastos realizados en territorio español.

O importe desta dedución non poderá ser superior a 3 millóns de euros.

O coprodutor financeiro que participe nunha produción española de longametraxe cinematográfica terá dereito a esta dedución en función da súa respectiva porcentaxe de participación.

Requisitos

Para a aplicación da dedución establecida neste apartado, cumprirá o cumprimento dos seguintes requisitos:

1. Que a produción obteña o correspondente certificado de nacionalidade e o certificado que acredite o carácter cultural en relación co seu contido, a súa vinculación coa realidade cultural española ou a súa contribución ao enriquecemento da diversidade cultural das obras cinematográficas que se exhiben en España, emitidos polo Instituto de Cinematografía e das Artes Audiovisuais.

2. Que se deposite unha copia nova e en perfecto estado da produción na Filmoteca Española ou a filmoteca oficialmente recoñecida pola respectiva Comunidade Autónoma, nos termos establecidos na Orde CUL/2834/2009.

A dedución prevista neste apartado xerarase en cada período impositivo polo custo de produción incorrido no mesmo, aínda que se aplicará a partir do período impositivo en que finalice a produción da obra.

No suposto de producións de animación, a dedución prevista neste apartado aplicarase a partir do período impositivo en que se obteña o certificado de nacionalidade sinalado na letra a) anterior.

A parte de investimento financiada con subvencións non dará dereito a dedución.

Límite de aplicación

O importe desta dedución, conxuntamente co resto de axudas percibidas polo contribuínte, non poderá superar o 50 por cento do custo de produción.

Non obstante, o devandito límite elevarase ata:

• O 60 por cento no caso de producións transfronteirizas financiadas por máis dun Es­tado membro da Unión Europea e en que participen produtores de máis dun Estado membro.

• O 70 por cento no caso das producións dirixidas por un novo realizador cuxo orzamento de produción non supere 1 millón de euros.

Prazo de aplicación da dedución

Esta dedución xerarase en cada período impositivo polo custo de produción incorrido neste, aínda que se aplicará a partir do período impositivo en que finalice a produción da obra.

Non obstante, no suposto de producións de animación, a dedución prevista neste apar­tado aplicarase a partir do período impositivo en que se obteña o certificado de nacionalidade sinalado anteriormente.

As cantidades non deducidas no período impositivo poderán aplicarse nas liquidacións dos períodos impositivos que conclúan dentro dos quince anos inmediatos e sucesivos.