4.3.4. Límite de cota íntegra

A cota íntegra do Imposto sobre o Patrimonio, conxuntamente coas cotas do IRPF, non poderá exceder, para os suxeitos pasivos sometidos ao imposto por obriga persoal, do 60 por 100 da suma das bases impoñibles do IRPF.

Para estes efectos:

1. Non se terá en conta a parte do Imposto sobre o Patrimonio que corresponda a elementos patrimoniais que, pola súa natureza ou destino, non sexan susceptibles de producir os rendementos gravados pola Lei do Imposto sobre a Renda das Persoas Físicas.

2. Non se terá en conta a parte da base impoñible do aforro derivado de ganancias e perdas patrimoniais que corresponda ao saldo positivo das obtidas polas transmisións de elementos patrimoniais adquiridos ou de melloras realizadas nos mesmos con máis dun ano de antelación á data de transmisión, nin a parte das cotas íntegras do Imposto sobre a Renda das Persoas Físicas correspondentes á devandita parte da base impoñible do aforro cuxo importe se consignará no recadro 32 do imposto sobre o Patrimonio.

   Para determinar este importe deberá calcularse, en primeiro lugar, o saldo neto das ganancias e perdas patrimoniais obtidas no exercicio que deriven da transmisión de elementos patrimoniais adquiridos con máis dun ano de antelación á data da transmisión.

3. Sumarase á base impoñible do aforro o importe percibido e non integrado na declaración de IRPF, polo reparto dos dividendos e participacións en beneficios obtidos en exercicios en que fose de aplicación o réxime especial das sociedades patrimoniais (Apartado 6 a) da Disposición Transitoria vixésimo segunda do Texto Refundido da Lei do Imposto sobre Sociedades aprobadas polo Real decreto Lexislativo 4/2004, do 5 de marzo).

4. No suposto de que a suma de ambas as dúas cotas supere o límite anterior, reducirase a cota do Imposto sobre o Patrimonio ata acadar o límite indicado, sen que a redución poida exceder do 80 por 100.