4.3.4. Límite de cota íntegra

A cota íntegra do Imposto sobre o Patrimonio, conxuntamente coas cotas do IRPF, non poderá exceder, para os suxeitos pasivos sometidos ao imposto por obriga persoal, do 60 %da suma das bases impoñibles do IRPF.

Para estes efectos:

1. Non se terá en conta a parte da base impoñible do aforro derivado de ganancias e perdas patrimoniais que corresponda ao saldo positivo das obtidas polas transmisións de elementos patrimoniais adquiridos ou de melloras realizadas nos mesmos con máis dun ano de antelación á data de transmisión, nin a parte das cotas íntegras do Imposto sobre a Renda das Persoas Físicas correspondentes á devandita parte da base impoñible do aforro.

   Sumarase á base impoñible do aforro o importe dos dividendos e participacións en beneficios aos que se refire a letra a) do apartado 6 da disposición transitoria vixésimo segunda do texto refundido da Lei do Imposto sobre Sociedades aprobadas polo Real decreto Lexislativo 4/2004, do 5 de marzo.

2. Non se terá en conta a parte do Imposto sobre o Patrimonio que corresponda a elementos patrimoniais que, pola súa natureza ou destino, non sexan susceptibles de producir os rendementos gravados pola Lei do Imposto sobre a Renda das Persoas Físicas.

3. No suposto de que a suma de ambas as dúas cotas supere o límite anterior, reducirase a cota do Imposto sobre o Patrimonio ata acadar o límite indicado, sen que a redución poida exceder do 80 %.

Cando os membros  dunha unidade familiar optasen pola tributación conxunta no IRPF, o límite das cotas íntegras conxuntas do devandito Imposto e da do Imposto sobre o Patrimonio, calcularase acumulando as cotas íntegras reportadas por aqueles neste último tributo.

Se é o caso, a redución que proceda practicar ratearase entre os suxeitos pasivos en proporción ás súas respectivas cotas íntegras no Imposto sobre o Patrimonio.