Bolsas de formación de investigadores

Bolsas que inclúe:

1. As bolsas públicas e as concedidas polas entidades sen fins lucrativos e as fundacións bancarias mencionadas anteriormente para investigación no ámbito descrito polo Real decreto 63/2006, do 27 de xaneiro, polo que se aproba o Estatuto do persoal investigador en formación (BOE do 3 de febreiro), desde que o programa de axudas á investigación fose recoñecido e inscrito no Rexistro xeral de programas de axudas á investigación a que se refire o artigo 3 do citado Real decreto.

   En ningún caso terán a consideración de bolsa as cantidades satisfeitas no marco dun contrato laboral.

   O Real decreto 63/2006, do 27 de xaneiro, esixe no seu artigo 1.2 para ter a condición de persoal investigador en formación os seguintes requisitos:

   • Os bolseiros sexan graduados universitarios.
   • As bolsas deben orientarse ao desenvolvemento de actividades de formación e especialización científica e técnica a través, como mínimo, dos correspondentes estudos oficiais de doutoramento.

   No referente ás bolsas o artigo 2 do citado Real decreto dispón que:

   • As bolsas deben concederse respectando os principios de publicidade, igualdade, mérito e capacidade na concesión das axudas correspondentes.
   • Os programas deben requirir a dedicación do persoal investigador en formación ás actividades de formación e especialización científica ou técnica obxecto das axudas.

2. As bolsas outorgadas polas entidades sen fins lucrativos anteriormente relacionadas con fins de investigación aos funcionarios e demais persoal ao servizo das Administracións públicas e ao persoal docente e investigador das universidades.

   Con esta finalidade, as bases da convocatoria deberán prever como requisito ou mérito, de forma expresa, que os destinatarios sexan funcionarios, persoal ao servizo das Administracións públicas e persoal docente e investigador das Universidades. A convocatoria deberá cumprir igualmente os requisitos comentados nas letras a), b) e c) anteriores con respecto ás bolsas para cursar estudos regrados.

Importe exento:

A exención acadará a totalidade da dotación económica derivada do programa de axuda de que sexa beneficiario o contribuínte.

Importante: no suposto de bolsas para a realización de estudos de terceiro ciclo e bolsas para investigación, a dotación económica exenta incluirá as axudas complementarias que teñan por obxecto compensar os gastos de locomoción, manutención e estancia derivada da asistencia a foros e reunións científicas, así como a realización de estancias temporais en universidades e centros de investigación distinta aos da súa adscrición para completar, en ambos os dous casos, a formación investigadora do bolseiro.