Indemnizacións exentas derivadas da extinción de relacións laborais especiais

Persoal de alta dirección

Normativa: Art. 2.1.a) Estatuto dos Traballadores

As indemnizacións por despedimento do persoal de alta dirección regúlanse no  artigo  11 do Real decreto 1382/1985, do 1 de agosto, que establece, no seu apartado un, para o caso de extinción do contrato por desistencia do empresario que o alto directivo terá dereito ás indemnizacións pactadas no contrato e, a falta de pacto, a indemnización será equivalente a sete días do salario en metálico por ano de servizo co límite de seis mensualidades.

A contía da indemnización fixada nestes supostos (7 días cun máximo de 6 mensualidades ) está exenta de acordo co criterio interpretativo establecido na sentenza 1528/2019, do 5 de novembro, da  Sección Segunda da  Sala do Contencioso-administrativo do   Tribunal Supremo.

Precisar que o fallo da Sentenza 1528/2019 baséase na doutrina sentada na sentenza do Pleno da Sala do Social do Tribunal Supremo do 22 de abril de 2014 (casación para a unificación de doutrina 1197/2013).

Así mesmo, conforme ao criterio interpretativo anterior, no suposto de despedimento declarado improcedente, considérase exenta a parte de indemnización que non supere a contía mínima obrigatoria prevista no apartado 2 do citado artigo 11 do Real decreto 1382/1985, do 1 de agosto (20 días de salario en metálico por ano de servizo e ata un máximo de 12 mensualidades).

Deportistas profesionais

Normativa: Art. 2.1.d) Estatuto dos Traballadores

Tratandose de deportistas profesionais con relación laboral especial (Real decreto 1006/1985, do 26 de xuño), ao establecer o artigo 15 do citado Real decreto 1006/1985 un límite mínimo de indemnización garantida de dous meses por ano traballado, considérase que goza da exención do artigo 7.e) da Lei do IRPF ata o importe da indemnización que corresponda ao devandito límite

Empregados do servizo do fogar familiar

Normativa: Arts. 2.1.b) Estatuto dos Traballadores e 11 do Real decreto 1620/2011, do 14 de novembro, polo que se regula a relación laboral de carácter especial do servizo do fogar familar (BOE do 17)

No caso empregados do servizo do fogar familiar (relación laboral de carácter especial regulada no Real decreto 1620/2011, do 14 de novembro) hai que distinguir a causa do cesamento ou despedimento:

Se o contrato se extingue por desistencia do empregador a indemnización exenta é:

• Para os contratos celebrados a partir do 1 xaneiro de 2012, de 12 días naturais por ano de servizo, co límite de 6 mensualidades
• Para os contratos anteriores a esa data, de 7 días por ano co límite de 6 mensualidades.

Se se trata de despedimento improcedente a indemnización exenta será de 20 días naturais por ano de servizo, co límite de 12 mensualidades.