Devindicación e período impositivo
Normativa: Arts. 12 e 13 Lei IRPF
Con carácter xeral, o período impositivo é o ano natural, devindicandose o IRPF o día 31 de decembro de cada ano.
Por conseguinte, a declaración do IRPF do exercicio 2019 terá que comprender a totalidade dos feitos e circunstancias con transcendencia fiscal para os efectos do devandito imposto que resulten imputables ao devandito ano natural.
O período impositivo é inferior ao ano natural exclusivamente cando se produza o falecemento do contribuínte nun día distinto ao 31 de decembro, finalizando entón o período impositivo e devindicandose nese momento o imposto.
Ningún outro suposto diferente ao falecemento do contribuínte (matrimonio, divorcio, separación matrimonial, etc.) dará lugar a períodos impositivos inferiores ao ano natural. Polo tanto, para un mesmo contribuínte non pode haber máis dun período impositivo dentro dun mesmo ano natural.
Unicamente nas declaracións que correspondan a períodos impositivos inferiores ao ano natural, deberá cubrirse o apartado “DEVINDICACIÓN”, situado na páxina 2 de modelo de declaración.
Importante : no suposto de falecemento dun contribuínte integrado nunha unidade familiar, os restantes membros poderán optar pola tributación conxunta, pero sen incluír as rendas do falecido na devandita declaración.
Exemplo:
Matrimonio formado polo cónxuxes "A" e "B" cos que convive o seu fillo "C" menor de idade. No mes de xuño prodúcese o falecemento do cónxuxe "A".
Determinar o período impositivo e formas de tributación dos compoñentes da unidade familiar.
Solución:
Os membros da unidade familiar poden optar por tributar da seguinte forma:
Tributación individual.
- Declaración individual do cónxuxe "A" con período impositivo inferior ao ano natural.
- Declaración individual do cónxuxe "B" con período impositivo igual ao ano natural.
- Declaración individual do fillo "C" con período impositivo igual ao ano natural.
Tributación individual e conxunta.
- Declaración individual do cónxuxe "A" con período impositivo inferior ao ano natural.
- Declaración conxunta dos restantes membros da unidade familiar ("B" e "C)" por todo o ano.