Saltar ao contido principal
Manual práctico de Renda 2020

Por coidado de fillos menores

Normativa:Art.º 5.1 Texto Refundido das disposicións legais da Comunidade de Castela e León en materia de tributos propios e cedidos, aprobado por Decreto Lexislativo 1/2013, do 12 de setembro.

Contías e límites máximos da dedución

Os contribuíntes que, por motivos de traballo, por conta propia ou allea, teñan que deixar aos seus fillos menores ao coidado dunha persoa empregada de fogar ou en gardarías ou centros infantís poderán optar por deducir algunha das seguintes cantidades:

  • O 30 por 100 das cantidades satisfeitas no período impositivo á persoa empregada do fogar, co límite máximo de 322 euros, tanto en tributación individual como conxunta.
  • O 100 por 100 dos gastos satisfeitos de preinscrición e de matrícula, así como os gastos de asistencia en horario xeral e ampliado e os gastos de alimentación, sempre que se producisen por meses completos, en escolas, centros e gardarías infantís da Comunidade de Castela e León, inscritos no Rexistro de Centros para a conciliación da vida familiar e laboral, co límite máximo de 1.320 euros, tanto en tributación individual como conxunta.

Requisitos e outras condicións de aplicación da dedución

Normativa:Véxase o art.º 10 do Texto Refundido

  • Que, á data de devindicación do imposto (normalmente, o 31 de decembro), os fillos aos que sexa de aplicación o mínimo por descendentes tivesen menos de 4 anos de idade.
  • Que ambos os dous pais realicen unha actividade por conta propia ou allea, pola cal estean dados de alta no réxime correspondente da Seguridade Social ou Mutualidade.
  • Que, no suposto de que a dedución sexa aplicable por gastos de custodia por unha persoa empregada de fogar, esta estea dada de alta no Sistema Especial para Empregados do Fogar do Réxime Xeral da Seguridade Social.

    Importante: os contribuíntes con dereito á dedución deberán facer constar o NIF da persoa empregada do fogar, escola, centro ou gardaría infantil no Anexo B.3 da declaración.

  • Para poder aplicar esta dedución a base impoñible xeral máis a base impoñible do aforro menos o mínimo persoal e familiar (casas [0435], [0460] y [0519] da declaración, respectivamente) non supere as seguintes cantidades:

    • 18.900 euros en tributación individual.
    • 31.500 euros en tributación conxunta.
  • Cando máis dun contribuínte teña dereito á aplicación desta dedución respecto dos mesmos descendentes, o importe das cantidades satisfeitas ratearase entre eles por partes iguais, respectando, en todo caso, o límite máximo da dedución.

    Importante: no caso de terse percibido subvencións públicas por este concepto, o importe total da dedución máis a contía das subvencións percibidas, non poderá superar, para o mesmo exercicio, o importe total do gasto efectivo, minorándose neste caso o importe máximo da dedución na contía necesaria.

  • No suposto de que o contribuínte careza de cota íntegra autonómica abondo para aplicarse o total da dedución no período impositivo en que se xere o dereito a esta, o importe non deducido poderá aplicarse nos tres períodos impositivos seguintes ata esgotar, se é o caso, o importe total da dedución.

Atención: os contribuíntes que non esgotasen a totalidade da dedución tanto no período impositivo en que se xere o dereito a esta como nos tres períodos seguintes, poderán solicitar o abono da cantidade que reste por aplicar.