Ganancias e perdas patrimoniais que integran a base impoñible do aforro

Normativa: Art. 46 Lei IRPF

As ganancias e perdas patrimoniais que se poñan de manifesto con ocasión de transmisións de elementos patrimoniais integran a base impoñible do aforro e deben declararse na rúbrica que corresponda do epígrafe F2 da declaración.

Poden citarse, a título de exemplo, as seguintes:

Ganancias e perdas patrimoniais derivadas de transmisións ou reembolsos de accións ou participacións de institucións de investimento colectivo (sociedades e fondos de investimento).

Estas ganancias patrimoniais estiveron suxeitas á retención ou ingreso a conta do 19 por 100 no exercicio 2021. O importe destas retencións e ingresos a conta deberá declararse no apartado da declaración correspondente a retencións e demais pagamentos a conta.
Ganancias e perdas patrimoniais derivadas de accións ou participacións negociadas en mercados oficiais.
Ganancias e perdas patrimoniais derivadas doutros elementos patrimoniais como, por exemplo, bens inmobles, accións non admitidas a negociación, etc.
Outras ganancias patrimoniais como, por exemplo, os intereses indemnizatorios.

No IRPF os intereses percibidos polo contribuínte teñen diferente cualificación, en función da súa natureza remunerativa ou indemnizatoria. Os intereses remunerativos constitúen a contraprestación, ben da entrega dunha capital que debe ser reintegrado no futuro, ben do adiamento no pagamento, outorgado polo acredor ou pactado polas partes. Estes intereses tributarán no imposto como rendementos do capital mobiliario, agás cando, de acordo co previsto no artigo 25 da Lei do IRPF, proceda cualificaros como rendementos da actividade empresarial ou profesional.

A diferenza dos anteriores, os intereses indemnizatorios teñen como finalidade resarcir ao acredor polos danos e prexuízos derivados do incumprimento dunha obriga ou o atraso no seu correcto cumprimento, tal como ocorre con respecto aos intereses por amora no pagamento do salario. Estes intereses, debido ao seu carácter indemnizatorio, non poden cualificarse como rendementos do capital mobiliario. En consecuencia, a teor do que se dispón nos artigos 25 e 33.1 do mesmo texto legal, teñen que tributar como ganancia patrimonial.

Non obstante, a Sentenza do Tribunal Supremo núm. 1651/2020, do 3 de decembro, recaída no recurso de casación contencioso-administrativo (ROJ: STS 4027/2020) establece a non consideración de ganancias patrimoniais dos xuros de mora abonados pola Axencia Tributaria ao efectuar unha devolución de ingresos indebidos aos que se refire a devandita Sentenza, establecendo que non están suxeitos ao IRPF.
A cuantificación dos intereses indemnizatorios corresponderase co importe que se perciban por este concepto e deben declararse no recadro [0389] da declaración, dentro do epígrafe F2.