Exemplo: achegas a sistemas de previsión social
Don S.M.G. solteiro, achegou no ano 2020 a cantidade de 3.000 euros ao plan de pensións do sistema emprego cuxo promotor é a empresa en que traballa. Pola súa banda, a empresa realizou ao seu favor nese exercicio unha contribución empresarial de 2.600 ao citado plan de pensións e de 2000 euros a un contrato de seguro colectivo de dependencia que contratou para instrumentar os compromisos asumidos co seu persoal no convenio.
Ao non poder practicar redución da base impoñible pola totalidade das achegas e contribucións Don S.M.G. solicitou, na súa declaración individual do IRPF do exercicio 2020, reducir nos cinco exercicios seguintes o exceso pendente que ascendía a 3.500 euros polas achegas e contribucións ao plan de pensións, e 1.500 euros pola contribución empresarial ao seguro colectivo de dependencia.
Polo que se refire ao exercicio 2021, o contribuínte efectuou achegas ao plan de pensións por importe de 2000 euros e a empresa contribucións ao citado plan por importe de 3.500 euros e de 2000 euros ao contrato de seguro colectivo de dependencia que contratou para instrumentar os compromisos asumidos co seu persoal no convenio.
Determinar a redución aplicable por achegas a plans de pensións no exercicio 2021, sabendo que os rendementos netos do traballo do contribuínte ascenden a 30.500 euros e coincide coa súa base impoñible xeral que tamén é de 30.500 euros.
Solución:
BASE IMPOÑIBLE XERAL = 30.500
REDUCIÓNS POR ACHEGAS E CONTRIBUCIÓNS AO PLAN DE PENSIÓNS
Os pasos que hai que seguir son os seguintes:
-
Determinación das cantidades pendentes de reducir procedentes de 2020 correspondentes ás achegas e ás contribucións a plans de pensións
Como entre as cantidades pendentes de reducir correspondentes a 2020 existen achegas realizadas polo contribuínte e contribucións imputadas polo promotor debe determinarse, en primeiro lugar, que importe corresponde a contribucións empresariais e cal ás achegas directas do contribuínte.
Con esta finalidade, de acordo coa disposición transitoria décimo novena do Regulamento de IRPF, entenderase que as cantidades pendentes de redución corresponden a contribucións imputadas polo promotor, co límite das contribucións imputadas nos devanditos períodos impositivos. O exceso sobre o devandito límite entenderase que corresponde a achegas do contribuínte.
Polo tanto:
-
Exceso exercicio 2020 correspondente a contribucións empresariais = 2.600
-
Exceso exercicio 2020 correspondente a achegas directas (3.500 – 2.600) = 900
-
Total (2.600 + 900) = 3.500
-
-
Límites máximos conxunto para as reducións
Como límite máximo conxunto para as reducións (tanto dos excesos correspondentes ao exercicio 2020 como polas achegas e contribucións a plans de pensións realizadas no exercicio 2021) aplícase a menor das seguintes cantidades:
-
Límite porcentual: 30% s/30.500 euros dos rendementos netos de traballo = 9.150 euros
-
Límites de achegas e contribucións
-
2000 euros polo conxunto de achegas e contribucións, sen prexuízo de que o importe destas últimas poida incrementarse en 8.000 euros adicionais
Tendo en conta estes límites, as reducións aplicaranse primeiro sobre os excesos de 2020 e posteriormente sobre as cantidades de 2021 (ver pasos 3 e 4).
-
Límite adicional propio de 5.000 euros por primas ao seguro colectivo de dependencia: Neste caso 2000 euros do exercicio 2021 + 1.500 do exercicio anterior 2020 = 3.500 euros que esta dentro do límite adicional de 5.000 euros
-
-
O importe da base impoñible xeral do contribuínte (30.500 euros)
Teñase en conta que a base impoñible non pode resultar negativa como consecuencia das reducións polo que o importe da base impoñible xeral debe terse en conta tamén como límite da redución.
Polo tanto , neste caso o límite máximo conxunto da redución será o limite porcentual do 30 por 100 sobre os rendementos de traballo que ascende a 9.150 euros.
-
-
Redución dos excesos correspondente ao exercicio anterior 2020: 5.000 euros
O importe pendente de reducir procedente de 2020, que ascende a 5.000 euros (3.500 euros por achegas e contribucións e 1.500 por contribucións ao seguro colectivo de dependencia) non supera o límite máximo conxunto de redución aplicable en 2021 (que é de 9.150 euros) e aplícase en primeiro lugar sobre a base impoñible e polo seu importe total.
Unha vez aplicado o exceso do exercicio 2020, debe procederse á determinación do remanente da base impoñible xeral, con obxecto de practicar a redución que corresponda polas achegas e contribucións a plans de pensións correspondentes ao exercicio 2021. Polo tanto:
-
Redución por achegas e contribucións correspondentes ao exercicio 2021: 4.150 euros
Ao reducir en primeiro lugar os excesos pendentes do exercicio 2020, o importe con dereito a reducir na base impoñible por todas as achegas e contribucións correspondentes ao exercicio 2021 non pode superar 4.150 euros (9.150 límite máximo conxunto – 5.000 excesos exercicio anterior).
Na medida en que esta última cantidade (4.150 euros) é inferior á suma das achegas e contribucións realizadas en 2021 ao plan de pensións e ao seguro colectivo de dependencia que poden ser obxecto de redución (1.100 por achegas + 3.500 por contribucións + 2000 por seguro colectivo de dependencia = 6.600), o seu importe deberá distribuírse de forma proporcional ás cantidades respectivamente achegadas:
Reparto proporcional:
- Por achegas ao plan de pensións (4.150 x 1.100) ÷ 6.600 = 691,66
- Por contribucións empresariais (4.150 x 3.500) ÷ 6.600 = 2.200,75
- Por contribucións ao seguro colectivo de dependencia (4.150 x 2000) ÷ 6.600 = 1.257,57
BASE LIQUIDABLE XERAL (30.500 – 9.150) = 21.350
EXCESOS DO EXERCICIO 2021 A REDUCIR NOS 5 EXERCICIOS SEGUINTES
As cantidades achegadas que non puideron ser obxecto de redución na base impoñible por aplicación do límite porcentual do 30 %aplicado neste caso poderanse reducir nos cinco exercicios seguintes.
No presente caso os excesos que hai que reducir nos exercicios seguintes serán:
- Por achegas ao plan de pensións 2000 - 691,66 = 1.308,34
- Por contribucións empresariais 3.500 - 2.200,75 = 1.299,25
- Por contribucións ao seguro colectivo de dependencia: 2000 - 1.257,57 = 742,43
O importe destes excesos poderá reducirse nos cinco exercicios seguintes, cubrindo os subapartados correspondentes dos Anexos C.2 e C.3 da declaración.