Por gastos derivados da adecuación dun inmoble con destino ao arrendamento como vivenda habitual

Normativa: Art. 15 ter Texto Refundido das disposicións legais vixentes ditadas pola Comunidade Autónoma das Canarias en materia de tributos cedidos, aprobado por Decreto-lexislativo 1/2009, do 21 de abril

Contía e límite máximo da dedución

• O 10 por 100 das cantidades satisfeitas no período impositivo polos contribuíntes, que correspondan a algún dos seguintes conceptos:

  • - Gastos de reparación e conservación, así como calquera outro necesario para que un inmoble se encontre en condicións de ser arrendado.

  • - Gastos de formalización de contratos de arrendamento.

  • - Primas de seguros por danos e impagos.

  • - Gastos necesarios para a obbtención de certificados de eficiencia enerxética.

• O límite máximo de dedución é de 150 euros por inmoble arrendado, tanto en tributación individual como en conxunta.

Requisitos e outras condicións para a aplicación da dedución

• A base desta dedución estará constituída polas cantidades xustificadas con factura, que deberá cumprir todas as condicións establecidas no Regulamento polo que se regulan as obrigas de facturación aprobado polo Real decreto 1619/2012, do 30 de novembro.

  A factura recibida polo contribuínte deberá conservarse durante o prazo de prescrición.

  Se se trata de matrimonios en réxime de gananciais as cantidades satisfeitas polo matrimonio, atribuiranse a ambos os dous cónxuxes por partes iguais, polo que ambos os dous poderán (en caso de cumprir co resto dos requisitos establecidos na norma) aplicar a dedución sobre a metade das cantidades satisfeitas  (incluso no caso de que a factura estea soa a nome dun deles). No resto dos casos (matrimonios en réxime de separación de bens, parellas de feito, etc.) deberase acreditar quen satisfixo os gastos  e ese será quen poida aplicar a dedución pola totalidade das cantidades satisfeitas por el, sempre que o devandito contribuínte cumpra co resto de requisitos establecidos na normativa.

• A dedución só resultará aplicable aos arrendamentos de vivenda prevista no artigo 2 da Lei 29/1994, do 24 de novembro, de arrendamentos urbanos.

• En caso de incorrer en gastos de reparación e conservación do inmoble, a aplicación da presente dedución queda condicionada á declaración por parte do contribuínte do número de identificación fiscal do prestador dos servizos e do seu importe anual.

• A base da dedución minorarase no importe das axudas concedidas polas Administracións Públicas no período impositivo de que se trate, que cubran a totalidade ou parte dos gastos que dan dereito á dedución, sempre que tales axudas teñan a consideración de renda exenta aos efectos do IRPF.

• Cando dous ou máis contribuíntes teñan dereito a esta dedución, o seu importe ratearase entre eles en función da porcentaxe de participación na propiedade ou usufruto do inmoble.

Incompatibilidade

A presente dedución resulta incompatible coa aplicación da dedución autonómica "Por gastos en primas de seguros de crédito para cubrir impagos de rendas de arrendamentos de vivenda", non podendo aplicarse sobre as mesmas cantidades ambas as dúas deducións.

Importante : unha vez introducida polos contribuíntes con dereito á dedución a información necesaria para o seu cálculo, será automaticamente trasladada ao apartado "Información adicional á dedución autonómica das Canarias por gastos derivados da adecuación dun inmoble con destino ao arrendamento como vivenda habitual" do Anexo B.12 da declaración.