Por achegas aos fondos propios de entidades que desenvolvan actividades económicas

Importante : a presente dedución non resulta aplicable aos investimentos efectuados por contribuíntes falecidos con anterioridade ao 13 de novembro  de 2024.

Normativa: Art. 5 Decreto Lei 12/2024, do 12 de novembro, do Consell, de medidas fiscais de apoio ás persoas afectadas polas inundacións producidas pola DANA de outubro de 2024

Contía e límite máximo da dedución

• O 45 por 100 das cantidades investidas  na subscrición e desembolso de accións ou participacións sociais como consecuencia de acordos de constitución ou de ampliación de capital de sociedades anónimas, de responsabilidade limitada e sociedades laborais ou de achegas voluntarias ou obrigatorias efectuadas polos socios ás sociedades cooperativas.

• Establécese un límite máximo de 9.900 euros por contribuínte.

• A base da dedución non poderá superar o 30 por 100 da base liquidable do contribuínte.

  Importante : esta última limitación non resulta aplicable aos investimentos efectuados por contribuíntes falecidos entre o 13 de novembro e o 23 de decembro de 2024.

Requisitos e outras condicións para a aplicación da dedución

• A entidade na que hai que materializar o investimento ten que cumprir os seguintes requisitos :

  1. Deberá ter o seu domicilio social e fiscal dentro do ámbito territorial de aplicación da presente dedución  e mantero durante os tres anos seguintes á constitución ou ampliación.

     No caso de empresas xa existentes a data do 12 de novembro de 2024, de aprobación do Decreto Lei 12/2024, a devandita circunstancia debería cumprirse o 29 de outubro de 2024.

  2. No caso de que sexa unha entidade xa existente a data do 13 de novembro de 2024, de entrada en vigor do Decreto Lei 12/2024,  deberá solicitar un ERTE para os seus traballadores e traballadoras como consecuencia do temporal.

  3. No suposto de que se trate dunha entidade de nova creación, non ten que tratarse de accións ou participacións nunha entidade a través da que se exerza a mesma actividade que se viña exercendo anteriormente mediante outra titularidade.

  4. Deberá exercer unha actividade económica durante os tres anos seguintes á constitución ou ampliación.

     Con esta finalidade, non se entenderán comprendidas as entidades cuxa actividade principal consista na xestión dun patrimonio mobiliario ou inmobiliario, de acordo co que se dispón no artigo 4.8.° Dous.a) da Lei 19/1991, do 6 de xuño, do Imposto sobre o Patrimonio, en ningún dos períodos impositivos da entidade concluídos con anterioridade á transmisión da participación.

  5. Terá que contar, como mínimo, cunha persoa ocupada con contrato laboral e a xornada completa, ou varias persoas sempre que a suma das súas xornadas laborais sexa, polo menos, equivalente a unha completa, dadas de alta no réxime xeral da Seguridade Social durante os tres anos seguintes á constitución ou ampliación, agás se se trata de sociedades laborais ou sociedades cooperativas de traballo asociado.

Importante : as limitacións previstas nos puntos 1 (segundo parágrafo), 2 e 3 anteriores non resultan aplicables aos investimentos efectuados por contribuíntes falecidos entre o 13 de novembro e o 23 de decembro de 2024.

• As operacións en que sexa aplicable a dedución teñen que formalizarse en escritura pública, na que ten que especificarse a identidade dos investidores e o importe do investimento respectivo.

  Non obstante, no caso das sociedades cooperativas e agás nos supostos de constitución, non será necesaria a formalización en escritura pública, debendose xustificar a subscrición e desembolso das achegas obrigatorias ou voluntarias ao capital social realizadas polas persoas socias mediante unha certificación asinada por quen ostente a secretaría da cooperativa, co visto e prace da presidencia da mesma e coas sinaturas lexitimadas notarialmente; cando se efectuasen pola mesma persoa socia varia subscricións ou desembolsos durante o ámbito temporal de aplicacion da presente deduccion será suficiente con que se expida unha única certificación, en que consten todas as datas de subscrición e desembolso.

• As participacións adquiridas deberán manterse no patrimonio do contribuínte durante un período mínimo dos tres anos seguintes á constitución ou ampliación.

Ámbito temporal de aplicación da dedución

A dedución resulta aplicable aos investimentos efectuados entre o 13 de novembro de 2024 e o 31 de decembro de 2025. 

Saldos pendentes de aplicación

A dedución deberá practicarse no período impositivo en que se realice a achega.

No suposto de que o contribuínte careza de cota íntegra autonómica suficiente para aplicar a totalidade ou parte da dedución no período en que se xere o devandito dereito, o importe non deducido poderá trasladarse aos tres períodos impositivos seguintes, ata esgotar, se é o caso, o seu importe total.

Incompatibilidade (non aplicable a contribuíntes falecidos entre o 13 de novembro e o 23 de diciciembre de 2024)

A presente dedución resulta incompatible coa aplicación da dedución autónomica "Por investimento en adquisición de accións ou participacións sociais en entidades novas ou de recente creación" respecto da mesma entidade receptora das achegas.

- En consecuencia, o contribuínte non poderá realizar achegas nun mesmo período impositivo dirixidas a unha mesma entidade que dean dereito á aplicación de ambas as dúas deducións, correspondan aos mesmos importes ou a outros diferentes. Iso non impide que no mesmo período poida aplicarse unha das deducións polas achegas realizadas no exercicio e a outra dedución por achegas á mesma entidade efectuada en períodos anteriores.

- Adicionalmente e xa que a incompatibilidade se establece respecto do mesmo contribuínte, en caso de tributación conxunta cada un do cónxuxes poderá aplicar unha dedución diferente por achegas á mesma entidade.

Importante: unha vez introducida polos contribuíntes con dereito á aplicación da dedución a información necesaría para o seu cálculo, será automaticamente trasladada ao apartado "Información adicional á dedución autonómica da Comunitat Valenciana por achegas aos fondos propios de entidades que desenvolvan actividades económicas" do Anexo B.12 da declaración.