Por gastos derivados da adecuación dun inmoble baleiro con destino ao arrendamento como vivenda

Normativa: Art. 5.Vinte e dous Texto Refundido das disposicións legais da Comunidade Autónoma de Galicia en materia de tributos cedidos polo Estado, aprobado por Decreto Lexislativo 1/2011, do 28 de xullo

Contía e base máxima da dedución

O 1 5 por 100 das cantidades satisfeitas polas obras de reparación e conservación, así como calquera outro gasto necesario para que o inmoble se encontre en condicións de ser arrendado como vivenda, incluída a obtención do certificado de eficiencia enerxética e a formalización do contrato de arrendamento, no período impositivo en que se constitúa o arrendamento.

Precisións :

1. Enténdense como gastos de reparación e conservación os definidos no artigo 13 do Regulamento do IRPF.

2. Enténdense incluídos no concepto calquera outro gasto necesario para que un inmoble se encontre en condicións de ser arrendado como vivenda, xunto aos de obtención do certificado de eficiencia enerxética e de formalización do contrato de arrendamento, os gastos de xestoría, impostos por obras, alta de subministracións e publicidade do alugamento.

3. Serán así mesmo deducibles os gastos reportados no prazo con que conta o contribuínte para arrendar o inmoble a partir da finalización das obras, de seguido comentado.
A base máxima da dedución ascenderá a 9.000 euros por vivenda, tanto en tributación individual coma en tributación conxunta e estará constituída polas cantidades xustificadas con factura, que deberá cumprir todas as condicións establecidas no Regulamento polo que se regulan as obrigas de facturación, aprobado polo Real decreto 1619/2012, do 30 de novembro.

A factura recibida polo contribuínte deberá conservarse durante o prazo de prescrición.

Precisión:

No caso dunha comunidade de propietarios, as cantidades satisfeitas imputaranse a aquel a cuxo nome estea a factura non sendo que se demostre que foi paga con cargo á renda dos comuneiros ou da sociedade de gananciais.
A base máxima anual da dedución ascenderá a 3.000 euros por vivenda, tanto en tributación individual coma en tributación conxunta. As cantidades satisfeitas non deducidas por exceder a base este límite máximo poderán deducirse co mesmo límite nos 2 exercicios seguintes.

Importante : a base máxima e a base máxima anual da dedución ratearanse en función do importe pago por cada un dos titulares da vivenda.

No caso de que convivan no tempo a dedución prevista para 2 ou para 3 vivendas, a base máxima total anual ascenderá a 6.000 euros e as cantidades satisfeitas non deducidas por exceder este importe poderán deducirse co mesmo límite nos 4 exercicios seguintes.

Requisitos e outras condicións para a aplicación da dedución

A dedución soa resultará aplicable a inmobles radicados en Galicia en que se constitúa o arrendamento de vivenda previsto no artigo 2 da Lei 29/1994, do 24 de novembro, de arrendamentos urbanos.
Os bens inmobles deberán levar baleiros durante, polo menos, un ano anterior ao inicio das obras .

O prazo mínimo dun ano en que o inmoble debe estar baleiro computarase de data a data, sen prexuízo de que durante unha parte do período impositivo anterior o inmoble non tivese a consideración de vivenda baleira.

Entenderase que un inmoble se encontra baleiro cando non estea habitado, arrendado, en uso nin afecto a actividades económicas.
As obras deberán concluír no prazo máximo de dous anos. A data de finalización acreditarase mediante a data da factura expedida polas obras.
O ben inmoble deberá ser arrendado nun prazo máximo de 6 meses desde a data de finalización das obras.
O contrato de arrendamento deberá ter unha duración efectiva de polo menos tres anos.

Enténdese cumprido este requisito cando a duración inicial establecida no contrato de arrendamento fose por un prazo inferior ao prazo mínimo de duración de tres anos (ou non se estipulase prazo de duración, ou este fose indeterminado) e co sistema de prórrogas anuais obrigatorias acádese o mínimo de tres anos de duración.

Non obstante, non se perderá o dereito á dedución no caso de que a duración do arrendamento sexa inferior a tres anos sempre que a vivenda pase a estar en situación de expectativa de alugamento e volva ser obxecto dun novo contrato de arrendamento de vivenda dentro do prazo de seis meses desde a finalización do anterior contrato, sempre que a suma dos períodos de duración de ambos os dous contratos de arrendamento sexa igual ou superior a tres anos.
O valor do ben inmoble non poderá superar os 250.000 euros.

Con esta finalidade, tomarase como valor do ben inmoble o valor de referencia previsto na normativa reguladora do catastro inmobiliario, na data de devindicación do imposto no período impositivo en que finalicen as obras. No caso de que non exista o valor de referencia ou cando este non poida ser certificado pola Dirección Xeral do Catastro, tomarase como valor o valor de mercado.
A persoa arrendataria da vivenda non poderá ser o cónxuxe nin un parente, por consanguinidade ou por afinidade, ata o terceiro grao inclusive, do contribuínte.
O contribuínte deberá declarar o NIF da persoa ou persoas prestadoras dos servizos e o importe total satisfeito a cada unha delas .
O contribuínte deberá ser propietario dun máximo de tres vivendas, con independencia de onde estean estas radicadas, que poidan ser destinadas ao arrendamento, excluídos garaxes e rochos e sen ter en conta a súa vivenda habitual.

Precisións :

- Atenderase a que o inmoble teña a condición de vivenda e con independencia da porcentaxe de participación do contribuínte propietario ou usufrutuario.

- En tributación conxunta o cómputo do número máximo de vivendas debe realizarse por contribuínte.

Saldos pendentes de aplicación

A aplicación da dedución non poderá dar como resultado unha cota autonómica negativa.

A devandita aplicación terá lugar, sempre que exista cota íntegra autonómica suficiente, unha vez practicada a parte autonómica das deducións estatais e o resto das deducións autonómicas do exercicio.

Se, a consecuencia diso , o contribuínte non puidese aplicar a dedución na súa totalidade, poderá deducirse a cantidade non deducida nos catro exercicios seguintes ata o seu esgotamento, sempre que a vivenda continúe arrendada durante ese período e cumpra os requisitos anteriormente citados coa única excepción de que esixe que se ache baleira durante, polo menos, un ano antes do inicio das obras.

No caso de que o contribuínte teña dereito, no mesmo período impositivo, á presente dedución e á dedución "Polo arrendamento de vivendas baleiras", aplicarase en primeiro lugar aquela cuxo importe sexa inferior e a continuación o restante ata acadar o total da cota íntegra autonómica.

Importante : unha vez introducida polos contribuíntes con dereito á dedución a información necesaria para o seu cálculo, será automaticamente trasladada ao apartado "Información adicional á dedución autonómica de Galicia por gastos derivados da adecuación dun inmoble baleiro con destino ao arrendamento como vivenda" do Anexo B.15 da declaración.