Achegas

Dan dereito a reducir a base impoñible, as achegas realizadas a Plans de Pensións, Mutualidades de Previsión Social, Plans de Previsión Asegurada, Plans de Previsión Social Empresarial e Seguros de Dependencia severa ou de gran dependencia, constituídos a favor de:

1. Persoas cun grao de  discapacidade psíquica igual ou superior ao 33 %.

2. Persoas cun grao de  discapacidade física ou sensorial igual ou superior ao 65 %.

3. Persoas que teñan unha incapacidade declarada xudicialmente con independencia do seu grao, sempre que se traten de resolucións xudiciais anteriores á entrada en vigor da Lei 8/2021 de reforma do Código Civil.

   A partir da entrada en vigor da devandita Lei 8/2021 esténdese ás resolucións que declaren a curadoría representativa.

As achegas poden facerse por:

• A propia persoa con discapacidade partícipe; reducen a base impoñible na declaración do contribuínte con discapacidade que realiza a achega.

• Os que teñan relación de parentesco coa persoa con discapacidade en liña directa ou colateral ata o terceiro grao inclusive, e polo cónxuxe ou quen lle tivesen ao seu cargo en réxime de tutela ou acollemento; reducen a base impoñible na declaración da persoa que as realiza.

As achegas anuais máximas son:

1. 24.250 euros anuais para as achegas realizadas polas persoas con discapacidade partícipe.

2. 10.000 euros anuais para as achegas realizadas por cada unha das persoas coas que o partícipe con discapacidade teña relación de parentesco, polo cónxuxe ou polos que lle tiveren ao seu cargo en réxime de tutela ou acollemento. Todo iso, sen prexuízo das achegas que estas persoas poidan realizar ao seu respectivo plan de pensións.

3. 24.250 euros anuais, computando tanto as achegas realizadas pola persoa con discapacidade como as realizadas por todas aqueloutras que realicen achegas a favor do mesmo partícipe con discapacidade.

Os límites establecidos serán conxuntos para todos os sistemas de previsión social constituídos a favor de persoas con discapacidade.

As achegas poderán ser obxecto de redución da base impoñible do IRPF cos seguintes límites máximos:

1. 24.250 euros anuais para as achegas realizadas pola persoa con discapacidade partícipe.

2. 10.000 euros anuais para as achegas realizadas por cada un daqueles cos que a persoa con discapacidade teña relación de parentesco ou titoría, así como polo cónxuxe. Todo iso, sen prexuízo das achegas que poidan realizar aos seus propios plans de pensións.

3. 24.250 euros anuais para o conxunto das reducións practicadas por todas as persoas que realicen achegas a favor dunha mesma persoa con discapacidade, incluídas as da propia persoa con discapacidade.

As achegas realizadas que non puidesen reducirse nos exercicios 2016 a 2020 por insuficiencia da base impoñible, imputaranse ao exercicio 2021, sempre que se solicitase nas respectivas declaracións poder reducir o exceso nos cinco exercicios seguintes.