A declaración recapitulativa de operacións intracomunitarias. Modelo 349
A correcta aplicación da tributación no IVE das operacións intracomunitarias require a existencia dun axeitado intercambio de información entre os Estados membros da Comunidade Europea. Para os empresarios e profesionais españois implica a presentación da declaración recapitulativa de operacións intracomunitarias.
O modelo que ten que utilizarse para estes fins é o modelo 349, aprobado pola Orde EHA/769/2010, do 18 de marzo, publicada no BOE do 29 de marzo de 2010.
Decláranse entregas e adquisicións de bens e prestacións de servizos, así como as transferencias de bens expedidos ou transportados desde o territorio de aplicación do Imposto con destino a outro Estado membro no marco de acordos de vendas de bens en consigna.
Debe presentara todo empresario ou profesional que realice entregas ou adquisicións intracomunitarias de bens e servizos ou transferencias de bens con destino a outro estado membro no marco de acordos de vendas de bens en consigna, calquera que sexa o seu réxime de tributación para os efectos do IVE. No suposto de realizar operacións reguladas no artigo 27.12º da Lei do IVE por medio dun representante fiscal, será este último o obrigado a presentar o modelo 349 por realizar a entrega intracomunitaria de bens exentos.
A declaración non se presentará nos períodos en que non se realizasen estas operacións.
Os empresarios que efectúen transferencias de bens con destino a outro estado membro no marco de acordos de venda de bens en consigna, deberán declarar estas transferencias no modelo 349 utilizando para iso as seguintes claves:
Clave «R»: Transferencias de bens efectuados no marco de acordos de vendas de bens en consigna.
Clave «D »: Devolucións de bens desde outro Estado membro ao que previamente foron enviados desde o TAI no marco de acordos de vendas de bens en consigna.
Clave «C »: Substitucións do empresario ou profesional destinatario dos bens expedidos ou transportados a outro Estado membro no marco de acordos de vendas de bens en consigna.