I.4.1.3.2. Aduana de partida

A declaración de tránsito envíase á aduana de partida en formato electrónico. As declaracións electrónicas pódense presentar na aduana de partida ou ben desde as propias instalacións dun operador económico.

A declaración debe incluír todos os datos solicitados e cumprir as especificacións do sistema, pois este codifica e valida os datos automaticamente.

Se estes presentan algunha incoherencia, o sistema detectaraa e informarase o declarante para que realice as correccións necesarias antes de que o documento sexa aceptado.

Notese que «corrixir» unha declaración de tránsito non debe entenderse como «rectificara» no sentido do artigo 31 do apéndice I do Convenio/artigo 173 do CAU (véxase o apartado IV.2.3.2 en relación coa rectificación da declaración de tránsito).

Unha vez introducidas as correccións e tras a aceptación da declaración, o sistema asigna a esta un número de rexistro único, o número de referencia mestre (NRM).

A continuación, despois de realizar todas as verificacións necesarias na propia aduana de partida ou nas instalacións do expedidor autorizado, unha vez aceptadas as garantías, permítese o tránsito das mercadorías.

O sistema imprime o documento de acompañamento de tránsito (DAT) e, en caso necesario, a lista de artigos (LdA), xa sexa na aduana de partida ou nas instalacións do expedidor autorizado.

O DAT e a LdA deberán acompañar ás mercadorías e presentaranse nas aduanas de camiño e na aduana de destino.

Cando se imprimen o DAT e a LdA, a aduana de partida envía simultaneamente a mensaxe IE001 á aduana de destino declarado.

Esta mensaxe contén principalmente información extraída da declaración que permitirá á aduana de destino controlar as mercadorías cando cheguen. Cumprirá que a aduana de destino teña acceso aos datos da declaración de tránsito, pois iso permitiralle tomar unha decisión correcta e fiable sobre as accións que deberá realizar cando cheguen as mercadorías.

No caso de que as mercadorías teñan que transitar por unha aduana de camiño, a aduana de partida enviará tamén a mensaxe IE050 para notificar con antelación á devandita aduana a fin de que poida verificar o movemento de mercadorías.