3.III.7.4. Informe final e documentación da auditoría

A verificación e os controis levados a cabo durante a auditoría, así como as conclusións dos auditores, deben documentarse con precisión. Cómpre documentar o realizado e non limitarse a conseguir datos acreditativos e información. Trátase dunha tarefa importante, tanto para as autoridades aduaneiras ao longo do proceso de autorización, incluída a xestión desta , como para o operador económico.

O informe final e a documentación da auditoría deben incluír a información que segue dun xeito inequívoco e sistemático:

• unha visión xeral clara do operador económico (a súa actividade empresarial, o seu papel na cadea de subministración, o seu modelo de negocio, as súas actividades aduaneiras, etc.);
• unha descrición clara e precisa do que se fixo para verificar o cumprimento dos criterios AEO;
• unha descrición clara de todas as áreas de risco consideradas e comprobadas e as accións de seguimento propostas ao solicitante;
• un informe claro das accións e reaccións emprendidas ou comunicadas polo solicitante aos auditores;
• unha recomendación expresa sobre a concesión ou non do estatuto de acordo co resultado das actividades de auditoría;
• no caso de que non se outorgue o estatuto de AEO, unha argumentación completa e detallada da denegación, incluída a información recibida doutros Estados membros, indicando se se conseguiu a través do procedemento de «información» ou o de «consulta »;
• un resumo do perfil de risco do AEO e, no caso de que se conceda este estatuto, as recomendacións en materia de seguimento e reavaliación (véxase a parte 5 das presentes Orientacións, «Xestión da autorización »).

Polo tanto, o informe final e a documentación da auditoría son documentos moi importantes que reflicten o labor xeral realizado (análise de riscos, planificación da auditoría, controis e visitas ás instalacións do solicitante, recepción de información doutros Estados membros, perfil de risco do operador económico, etc.) dun xeito resumido e sistematizado e achegan indicacións inequívocas para futuras accións.

Antes de que se redacten o informe final e a documentación da auditoría, se hai algún aspecto que non quedou claro o auditor volverá confirmar co operador económico os datos descritos no informe.