Obtención de rendas estranxeiras, regras xerais

Se unha persoa física é residente fiscal en España é contribuínte polo Imposto sobre a Renda das Persoas Físicas (IRPF) e debe tributar en España pola súa renda mundial, é dicir, debe declarar en España as rendas que obteña en calquera parte do mundo, sen prexuízo do que se dispoña no Convenio para evitar a dobre imposición internacional subscrito entre España e o país de orixe da renda.

Se a renda estranxeira procede dun país co que España subscribiu un Convenio para evitar a dobre imposición internacional, hai que acudir ás disposicións do Convenio para coñecer a potestade tributaria sobre a mesma e, se é o caso, as medidas aplicables para paliar a dobre imposición.

Os convenios enumeran uns tipos de rendas e dispón, respecto de cada unha delas , as potestades tributarias que corresponden a cada Estado asinante:

• nuns casos, potestade exclusiva para o país de residencia do contribuínte,

• noutros , potestade exclusiva para o país de orixe da renda e,

• Finalmente, nalgúns supostos, hai potestade compartida entre ambos os dous países, e poden gravar ambos os dous a mesma renda, pero coa obriga, en xeral, para o país de residencia do contribuínte, de arbitrar medidas para evitar a dobre imposición.

En xeral, en caso de dobre imposición, corresponderá a España como país de residencia arbitrar esas medidas, consistentes normalmente na aplicación dunha dedución. En determinados casos, o convenio pode dispoñer unha exención da renda no país de residencia, se ben con aplicación de progresividade, o que supón que a renda exenta se engade ao resto de rendas para calcular o tipo de gravame aplicable ao resto das rendas. Cando algún Convenio resulte aplicable, sempre cómpre consultar o Convenio concreto.

Se unha renda estranxeira procede dun país co que non hai Convenio para evitar a dobre imposición internacional, esa renda tributa en España. Se esa renda é gravada tamén no outro país, o contribuínte poderá aplicar a dedución por dobre imposición internacional prevista no artigo 80 da Lei 35/2006, do 28 de novembro, do IRPF.

O período impositivo do IRPF é o ano natural. Unha persoa será residente ou non residente durante todo o ano natural xa que o cambio de residencia non supón a interrupción do período impositivo.

A declaración da renda das persoas físicas residentes fiscais en España preséntase nos meses de abril, maio e xuño do ano seguinte ao de devindicación. A normativa do IRPF regula uns límites e condicións que determinan a obriga de presentar a declaración do imposto, que deberán consultarse cada ano.