Lembremos que…

As fronteiras marcan os límites territoriais dun país. As mercadorías e persoas con equipaxes que viaxan dun país a outro, ao cruzar a fronteira, teñen que pasar un control na Aduana.

As aduanas son todo o conxunto de instalacións onde se controlan as mercadorías que entran ou saen dun determinado territorio.

Desde 1993, dentro da Unión Europea non existen fronteiras entre os seus países membros. Isto significa que as mercadorías e as persoas con equipaxes poden ir libremente dun Estado a outro da Unión Europea sen que teñan que pasar controis administrativos na Aduana. Polo tanto, as aduanas controlan o intercambio de mercadorías con países de fóra da Unión Europea.

Os produtos que non cumpren a normativa aduaneira son produtos de contrabando. Distintos tipos de contrabando son:

• Tráfico de substancias ou artigos cuxa posesión está prohibida (drogas, armas, etc.).

• Tráfico ilícito de mercadorías que, pola súa natureza, precisen de controis moi específicos (animais, obras de arte, etc.).

• Entrada excesiva de artigos cuxa cantidade permitida está restrinxida ao uso persoal (tabaco, alcohol, etc.).

Así mesmo, a Aduana ten importantes funcións en materia de loita contra as falsificacións de artigos e contra a pirataría de discos, programas de ordenador, etc.