Funcións da Administración Tributaria

A Axencia Tributaria ten encomendada a aplicación efectiva do sistema tributario estatal e aduaneiro, así como daqueles recursos doutras Administracións Públicas nacionais ou da Unión Europea cuxa xestión se lle encomende por lei ou por convenio.

Polo tanto, corresponde á Axencia Tributaria aplicar o sistema tributario de tal forma que se cumpra o principio constitucional en virtude do que todos os cidadáns teñen que contribuír ao sostemento dos gastos públicos de acordo coa súa capacidade económica. Non obstante, a Axencia Tributaria non ten competencias para a elaboración e aprobación das normas tributarias, nin na vertente do gasto público para asignar os recursos públicos entre as diversas finalidades.

A función de xestión integral do sistema tributario estatal e aduaneiro materialízase nun amplo conxunto de actividades, entre as que destacan:

Xestión, inspección e recadación dos tributos estatais (IRPF; IVE, Sociedades e Impostos Especiais).
Recadación de ingresos das Comunidades e Cidades Autónomas ben por disposición legal ou por convenio.
Recadación dos ingresos propios da Unión Europea.
Xestión aduaneira e represión do contrabando.
Recadación en período voluntario das taxas do Sector Público Estatal.
Recadación en vía executiva de ingresos de dereito público da Administración Xeral do Estado.
Colaboración na persecución de delitos, especialmente contra a Facenda Pública e os de contrabando.

Así mesmo, hai que ter en conta que, as Comunidades Autónomas e as Entidades locais tamén teñen competencias sobre impostos. Por iso, nas súas respectivas administracións hai igualmente órganos encargados desta materia.

O obxectivo esencial da Axencia Tributaria é o fomento do cumprimento polos cidadáns das súas obrigas tributarias. Para iso, desenvolve dúas liñas de actuación:

informar e axudar os contribuíntes a cumprir as súas obrigas tributarias,
detectar e corrixir aquelas actuacións que non se axustan ao que establecen as leis tributarias.

Os servizos de información e asistencia ao contribuínte máis importante son:

Información e asistencia por Internet: na páxina web da Axencia Tributaria (sede.agenciatributaria.gob.es ) é posible obter información sobre normativa e procedementos tributarios e, ademais, se se dispón de sinatura electrónica, realizar practicamente todas as xestións sen necesidade de desprazamento ás oficinas. Así mesmo, na web existen numerosas ferramentas de asistencia virtual, que permiten unha comunicación sinxela.
Información telefónica sobre dúbidas de carácter tributario.
Datos fiscais e borrador de declaración. A Axencia Tributaria pon a disposición dos contribuíntes os seus datos fiscais, co obxecto de facilitar a presentación da súa declaración de IRPF. Tamén ofrece o borrador de declaración da renda, permitindo que cumpran coa súa obriga de presentación de forma sinxela.
Programas de axuda para a confección de declaracións. Existen programas informáticos de axuda para realizar as declaracións de practicamente todos os impostos. Con eles encher os formularios resulta moito máis sinxelo. No imposto sobre a Renda, o programa de axuda Renda Web é utilizado pola maioría dos contribuíntes obrigados a declarar.
Atención en oficinas.

As actuacións de control lévanse a cabo polos órganos de Xestión e Inspección Tributaria e Aduaneira e están destinadas a detectar e corrixir aquelas actuacións dos contribuíntes que non se axustan nas súas obrigas tributarias ao que establecen as leis, investigando, reprimiendo e sancionando os infractores. Tamén os órganos de Recadación informan e asesoran no pagamento dos impostos e recadan coactivamente aquelas débedas que non son atendidas nos prazos establecidos nas leis.