Introdución

A estatística "Resultados económicos e tributarios no IVE 2019" é unha investigación de carácter censual baseada na información que subministran os axentes económicos suxeitos ao Imposto sobre o Valor Engadido a través da declaración Resumo Anual de IVE (modelo 390), así como das declaracións periódicas, modelos 303 e 322.

O Real decreto 596/2016 do 2 de decembro implementa unha obriga para os declarantes de periodicidade mensual do Imposto sobre o Valor Engadido que consiste na leva dos libros rexistro de facturas a través da Sede electrónica da Axencia Tributaria. Este novo sistema de xestión denomínase "Subministración Inmediata de Información" (SII). A entrada en vigor do Real decreto o 1 de xullo de 2017 supuxo a eliminación da obriga de presentar o modelo 340 e o modelo 390, e por iso para a elaboración desta estatística, a partir do exercicio 2017, incorpórase unha pseudodeclaración do modelo 390 para suxeitos acollidos ao SII , ademais de que xa se viña realizando para os suxeitos exonerados, utilizando distintas fontes de datos (véxase "Nota explicativa dos cambios metodolóxicos do 2017).

Os datos do resumo-anual, que se presentan sen distinción da súa orixe (modelo 390 ou agregamento de declaracións periódicas), proporcionan información sobre os principais compoñentes das variables económicas a analizar tales como as vendas, compras, investimento e comercio exterior; así como das variables tributarias que determinan o saldo de IVE por declaración e os principais parámetros tributarios do imposto: tipos medios de vendas e de compras, pro ratas, etc.; variables, todas elas, que no seu conxunto explican a recadación do imposto.

O valor individual das declaracións de IVE, que conteñen información detallada das operacións económicas realizadas polos empresarios, convértese mediante o seu agregamento e axeitada clasificación estatística nunha ferramenta de análise da economía e da recadación do imposto para o que resulta especialmente útil a información presentada en táboas evolutivas.

A estatística "Resultados económicos e tributarios no IVE "está baseado en catro fontes tributarias distintas: as declaracións resumo-anual correspondentes aos suxeitos pasivos do Imposto sobre o Valor Engadido (modelo 390), as declaracións-liquidacións periódicas (modelos 303 e 322) daqueles empresarios exonerados de presentar o resumo-anual, as declaracións correspondentes ás operacións asimiladas á importación (modelo 380) e as declaracións aduaneiras correspondentes ás importacións de bens e a liquidación do imposto contido nos DUA (Documento Único Administrativo). Para garantir o tratamento integrado da información inclúense, dunha parte, as cotas reportadas por "Operacións asimiladas á importación "e por "Importacións" e, doutra , as deducións por "Operacións asimiladas á importación ", outorgando a ambas as dúas operacións o mesmo tratamento na liquidación do modelo 390 que o que se outorga ás cotas reportadas e deducidas por "Adquisicións intracomunitarias". Con estas consideracións, procédese a recalcular cada liquidación do modelo 390, completando os cálculos cos datos referidos se é o caso.

Agora ben, existen aspectos especificos que permitirán utilizar esta publicación como ferramenta ao servizo da análise recadadora:

Construción do concepto de recadación do período como sumatorio de varios compoñentes definidos todos eles como produto entre unha variable económica e o seu tipo medio ponderado de gravame.
Definición dunha conta de configuración da recadación do imposto en que, ademais dos compoñentes da recadación, defínense como variables de análise uns saldos recadadores que van incorporando, paso a paso, os efectos dos distintos aspectos normativos do imposto.
Implantación de dous novos criterios de clasificación ou agrupación de declarantes:
- CLASE: cuxo obxectivo é illar o grupo de declarantes cuxo comportamento ante o imposto sexa o máis xeral, é dicir, o que non sexa afectado por ningunha especialidade normativa que distorsione a súa liquidación. Esta clase denominouse de "Dedución Xeral" e distínguese daqueles declarantes en "Réxime simplificado", daqueles obrigados a repercutir tipos de IVE inferiores aos soportados e daqueles que realizan actividades sometidas a réximes especiais de dedución.
- COLECTIVO: cuxo obxectivo é agrupar os declarantes segundo a causa que orixina o signo da súa recadación do período, desta maneira diferéncianse aqueles que xeran un saldo positivo de que obteñen un saldo negativo. Neste último caso distinguirase se a súa causa é a realización de actividade exterior, investimentos ou consecuencia da súa actividade.

O IVE é a segunda fonte de ingresos non financeiros do Estado por detrás do Imposto sobre a Renda das Persoas Físicas, de aí que se faga fincapé na achega á análise recadadora que ofrece esta publicación.

Esta publicación constitúe unha peza fundamental do programa que a Axencia Estatal da Administración Tributaria emprendeu para facilitar aos analistas e ao público en xeral, parte da información que obra en poder da Facenda Pública como consecuencia da xestión recadadora.