Novidades publicadas no INFORMA 2022

Novidades publicadas no INFORMA durante o mes de NOVEMBRO

Cando se practicou unha anotación contable de forma errónea non pode acudirse á reformulación das contas anuais  xa aprobadas e cuxo prazo de impugnación transcorreu, a fin de corrixir o resultado contable e calcular a base impoñible no Imposto sobre Sociedades coa finalidade de solicitar a rectificación da súa autoliquidación e a devolución de ingresos indebidos.

Con carácter xeral as entidades en réxime de atribución de rendas tributan polo IRPF, non obstante, a disposición final segunda do Real decreto Lei 18/2022  modifica o apartado 2 do artigo 6  da LIS, de tal forma que as entidades en réxime de atribución de rendas ás que lles sexa aplicable o apartado 12 do artigo 15 bis da LIS tributarán polo Imposto sobre Sociedades. 

Os contribuíntes poderán  amortizar libremente os investimentos que se efectúen en instalacións destinadas ao autoconsumo de enerxía eléctrica,  así como aquelas  instalacións para uso térmico de consumo propio,  sempre que utilicen enerxía procedente de fontes renovables e substitúan instalacións que utilicen enerxía procedente de fontes non renovables fósiles e que sexan postas a disposición do contribuínte a partir do 20 de outubro  de 2022 e entren en funcionamento en 2023.

Unha entidade en réxime de atribución de rendas en que unha ou varias entidades, vinculadas entre si participen directa ou indirectamente en calquera día do ano, no capital, nos fondos propios, nos resultados ou nos dereitos de voto nunha porcentaxe igual ou superior ao 50 por cento e sexan residentes en países ou territorios que cualifiquen á entidade en réxime de atribución como contribuínte por un imposto persoal sobre a renda,  tributará polo Imposto sobre Sociedades,  en calidade de contribuínte,  por determinadas rendas positivas  que corresponda atribuír a todos os partícipes residentes en países ou territorios que consideren a entidade en atribución de rendas como contribuínte por imposición persoal sobre a renda.