1.6. Valoración da Axencia Tributaria polos cidadáns

Enquisas e estudos de opinión

O Instituto de Estudos Fiscais do Ministerio de Facenda e Administracións Públicas confecciona, anualmente, o estudo demoscópico “Opinións e actitudes fiscais dos españois”, tamén coñecido como “Barómetro Fiscal”.

O estudo realízase a partir dunha mostra de mil quiñentos cidadáns, distribuídos en cinco segmentos (empresarios, agricultores, profesionais, asalariados e inactivos), seleccionados por cotas de hábitat, xénero e idade e utilizando a técnica de entrevista persoal, con aplicación dun cuestionario estruturado.

Segundo os últimos datos publicados (referidos ao ano 2012 e anteriores) e presentados na Memoria da Axencia Tributaria 2012, a evolución da valoración que os españois fan dos servizos que presta a Axencia Tributaria mostra unha imaxe moi positiva da calidade destes, alcanzando unha cualificación de 2,9 (sobre 4).

Igualmente, é analizada neste estudo a opinión dos cidadáns respecto dos funcionarios da Axencia Tributaria, que obteñen a consideración de bos técnicos, imparciais no desempeño do seu labor e correctos no trato persoal.

Valoración dos servizos en campaña da renda polos contribuíntes

A Axencia Tributaria mediante a “Enquisa de imposto sobre a renda das persoas físicas 2012”, desenvolvida durante o ano 2013, sonda a opinión de quen utilizaron o servizo de presentación telemática de declaracións do imposto sobre a renda das persoas físicas, resultando que o 64,98 por cento dos contribuíntes que utilizaron este servizo se mostran satisfeitos ou moi satisfeitos cos servizos ofrecidos.

Un ano máis, os cinco servizos que os usuarios consideran de maior utilidade son a presentación de declaracións, a solicitude, rectificación e confirmación do borrador da renda, a consulta do estado das devolucións, a comunicación de datos dispoñibles relativos ao imposto sobre a renda das persoas físicas e a descarga do programa de axuda.

Queixas e suxestións. Consello para a Defensa do Contribuínte

O Consello para a Defensa do Contribuínte, órgano asesor da Secretaría de Estado de Facenda, vela pola efectividade dos dereitos dos obrigados tributarios, atendendo as queixas que se producen pola aplicación do sistema tributario que realizan os órganos do Estado, e efectúa suxestións e propostas. Réxese, no referente á súa competencia, composición e funcionamento, polas súas normas específicas.

En 2013, presentáronse ante o Consello para a Defensa do Contribuínte 8.301 queixas e suxestións en relación a actuacións da Axencia Tributaria. A información de detalle pode consultarse na Memoria Anual do Consello para a Defensa do Contribuínte.