3.2.3. Realización de trámites por teléfono

A Axencia Tributaria conta cun Centro de Atención Telefónica (901 20 03 45) operativo de luns a venres, de 9 a 19 horas (ata as 21 horas de abril a xuño e ata as 15 horas en agosto), e, entre os servizos de asistencia tributaria que presta, destacan os seguintes: comunicación do cambio de domicilio fiscal (agás obrigados a presentar os modelos 036  ou 037), solicitude de pagamento anticipado da dedución para nais traballadoras e xestión do borrador de declaración de Renda (en Campaña de Renda).

Ademais, a Axencia Tributaria dispón de servizos telefónicos automáticos, é dicir, Unidades de Recoñecemento de Voz (901 12 12 24), dispoñibles de luns a domingo, 24 horas ao día, para trámites moi sinxelos como a petición de etiquetas identificativas, información do estado da devolución do Imposto sobre a Renda das Persoas Físicas, a confirmación do borrador de declaración de Renda ou a solicitude de cita previa para modificar o borrador ou confeccionar a declaración de Renda.

Os servizos telefónicos automatizados recibiron, en 2013, un total de 3.385.435 chamadas, o que supón un 10,09 por cento menos que o ano anterior. A diferenza tan acusada no número de chamadas recibidas débese a que deixaron de atenderse por esta vía as solicitudes de borrador ou datos fiscais para a declaración do Imposto sobre a Renda das Persoas Físicas.