3.1. Recadación tributaria bruta

A recadación tributaria bruta está constituída polos ingresos efectivos obtidos no exercicio, procedentes tanto das autoliquidacións presentadas polos contribuíntes como das liquidacións practicadas pola Axencia Tributaria. Responde, polo tanto, a un criterio de caixa.

A recadación bruta total xestionada pola Axencia Tributaria en 2015 acadou os 227.535 millóns de euros, cun incremento con respecto a 2014 dun 2,6 por cento.

No cadro nº 12  do Anexo  móstrase a recadación bruta por figuras tributarias. O crecemento dos ingresos produciuse nun ano de reforma da imposición directa. Neste contexto, o crecemento dos ingresos explícase pola positiva evolución das bases impoñibles e polo aumento dos ingresos ligados a liquidacións de períodos anteriores (cotas diferenciais, devolucións, actas). Agás o IRPF, que foi o máis afectado pola reforma e descendeu un 0,2 por cento, todas as grandes figuras viron medrar a recadación en 2015: o Imposto de Sociedades (8,0 por cento), o Imposto sobre a Renda de Non Residentes (10,6 por cento), o resto do Capítulo I (15,2 por cento, polos elevados ingresos do Imposto sobre Sucesións e Doazóns e dos Impostos Ambientais), o IVE (2,8 por cento), os Impostos Especiais (1,9 por cento), o resto do Capítulo II (38,3 por cento, que inclúe en 2015 un cuadrimestre máis de recadación do Imposto sobre Gases Fluorados), e o Capítulo III (16,0 por cento, polo ingreso do Canon pola utilización de augas continentais na produción de enerxía eléctrica).