3.1. Recadación tributaria bruta

A recadación tributaria bruta está constituída polos ingresos efectivos obtidos no exercicio, procedentes tanto das autoliquidacións presentadas polos contribuíntes como das liquidacións practicadas pola Axencia Tributaria. Responde, polo tanto, a un criterio de caixa.

A recadación bruta total xestionada pola Axencia Tributaria en 2017 acadou os 240.688 millóns de euros, o que supuxo un incremento con respecto ao ano anterior do 4,1 por cento. O crecemento en 2017 estivo condicionado pola entrada en vigor en xullo do novo sistema de Subministración Inmediata de Información (SII) do IVE, que desprazou ingresos de 2017 a 2018. Se se corrixe este cambio, os ingresos medrarían un 5,7 por cento.

O principal factor que explica o crecemento dos ingresos foi a evolución das bases impoñibles. Estímase que a base impoñible agregada dos principais impostos medrou en 2017 arredor do 5,6 por cento. O crecemento produciuse tanto nas bases ligadas ás rendas (no medio do 5 por cento), como nas relacionadas co gasto (cun aumento do 6 por cento). Outro elemento que impulsou a recadación foi o resultado das declaracións anuais do IRPF e do Imposto sobre Sociedades, especialmente do primeiro. Hai que lembrar que estes resultados proceden das liquidacións das rendas do ano anterior (neste caso, de 2016) e, polo tanto, están desvinculados da evolución económica do ano en que se ingresan.

No referente ao detalle dos ingresos, as tres grandes figuras (IRPF, Imposto sobre Sociedades e IVE sen o efecto SII) medraron por riba do 4 por cento, mentres que os Impostos Especiais rexistraron un incremento máis moderado (1,9 por cento).

Noutras figuras distintas das catro principais, destacaron os aumentos no Imposto sobre a Renda dos Non Residentes e nos impostos ambientais (13,8 por cento e 14,8 por cento, respectivamente). No lado negativo, débese sinalar a caída da recadación no capítulo III (-8 por cento), debida ao descenso dos ingresos derivados de recargas, sancións e intereses e ao impacto negativo sobre as taxas xudiciais da Sentenza do Tribunal Constitucional de agosto de 2016, en que se declarou a inconstitucionalidade e nulidade das mesmas nalgúns procesos.