3.2.3. Evolución de ingresos por Impostos Especiais

En 2019 os ingresos por Impostos Especiais medraron un 4,1 por cento, pero o aumento prodúcese exclusivamente pola integración da antiga tarifa autonómica na tarifa especial do Imposto sobre Hidrocarburos. Os ingresos sen ningún cambio normativo descenderían un 0,8 por cento.

Os ingresos no Imposto sobre Hidrocarburos (unha vez restado o impacto neto dos cambios normativos) aumentaron un 0,3 por cento. O consumo de gasolinas e gasóleo de automoción medrou arredor do 0,5 por cento mentres que descendeu o consumo doutros produtos (gasóleo bonificado, gas natural). No Imposto sobre Labores do Tabaco os ingresos volveron caer en 2019, nesta ocasión un 1,3 por cento (-1,4 por cento en 2018). Sen cambios nos tipos e con prezos estables, as explicacións desta nova caída son o menor consumo e o desprazamento cara a labores menos gravadas. Con respecto ao resto dos ingresos, no Imposto sobre a Electricidade os ingresos medraron un 1,8 por cento, debido tanto á diminución do consumo con respecto ao ano anterior como á dos prezos na última parte do ano, ao compararse co repunte que se viviu na segunda metade de 2018. Os ingresos no Imposto sobre o Carbón reducíronse un 48,7 por cento. O carbón deixou de ser atractivo na produción de enerxía cando o RDL 15/2018 pasou a considerar exentos os consumos de gas natural coa mesma fin. As intencións de abandonar progresivamente esta forma de produción anunciada polas grandes operadoras tamén puideron ter efecto este ano. Por último, a recadación do Imposto sobre Alcohol e bebidas derivadas rexistrou unha perda de ingresos do 2,4 por cento (-2,2 por cento en 2018), en tanto que os ingresos polo Imposto sobre a Cervexa aumentaron un 4 por cento.