• Operaban fraudulentamente utilizando unha das páxinas web máis activas de España na comercialización en liña de gases refrixerantes

• Os cabecillas importaban o gas procedente da China de maneira irregular, tanto polos recipientes e transporte utilizado como polo incumprimento do sistema de cotas establecidas pola Unión Europea

• Foron intervidas 843 botellas de gas refrixerante dun só uso, cuxa comercialización está prohibida na UE

8 de setembro de 2022.- A Axencia Tributaria e a Garda Civil, en colaboración con Europol, levaron a cabo a operación " Fake Cold ", dirixida á desarticulación dunha organización criminal de orixe rusa asentada en Barcelona e Girona, que importaba gas refrixerante ilegal desde China.

No marco da operación foron detidas catro persoas de nacionalidade rusa, tres homes e unha muller, como presuntas autoras dos delitos de pertenza a organización criminal, contrabando, contra a Facenda Pública e contra o medio natural.

A investigación comezou en novembro do ano 2020, cando axentes do Servizo de Protección da Natureza (SEPRONA) da Garda Civil e funcionarios da Vixilancia Aduaneira da Axencia Tributaria tiveron coñecemento da recepción de envíos de gas refrixerante R134a, contido en recipientes non recargables, e algún deles inflamables, a través de empresas de paquetaría ordinaria.

A raíz desta investigación descubriuse que se trataba dunha organización criminal formada por catro cidadáns de orixe rusa que importaba o gas procedente da China de maneira irregular, tanto polos recipientes e trasporte utilizados, como polo incumprimento do sistema de cotas establecidas na Unión Europea.

La Unión Europea estableceu un mecanismo para a redución gradual deste tipo de gases a través dun sistema europeo de cotas, de xeito que, para ser importados ou fabricados en territorio da Unión, ao importador ou fabricante legalmente autorizado élle asignada anualmente pola Comisión Europea unha cota de importación ou fabricación a fin de que non se supere o límite cuantitativo xeral.

A finais de xuño pasado realizáronse tres rexistros nun domicilio, un almacén e un despacho de avogados das provincias de Barcelona e Girona en que se interviñeron 843 botellas de gas refrixerante dun só uso (cuxa comercialización está prohibida), dous coches, unha motocicleta e unha moto de auga.

Os gases refrixerantes deben estar contidos en cilindros a presión homologada, quedando totalmente prohibida a comercialización e o uso de colectores non recargables desde o 2007, xa que non cumpren coa normativa ADR que regula o transporte de mercadorías perigosas, xa que existe a posibilidade de que o contido de gas residual escape posteriormente á atmosfera.

Tres dos detidos foron postos a disposición do Xulgado de Instrución número 5 de Blanes (Girona), mentres que o cuarto presentouse voluntariamente en sede xudicial ao estar en busca e captura.