Operación conxunta da Axencia Tributaria e a Garda Civil

• Os apresamentos monetarios realizáronse no mes de xaneiro e a primeira semana de febreiro
• Os viaxeiros foron denunciados ante o Servizo Executivo da Comisión para a Prevención do Branqueo de Capitais e Infraccións Monetarias

15 de febreiro de 2023.- Funcionarios do Servizo de Vixilancia Aduaneira da Axencia Tributaria canda gardas civís da Sección Fiscal e de Fronteiras do aeroporto de Bilbao interviñeron máis de 46.000 euros e 6.000 dólares americanos sen declarar a tres pasaxeiros os días 17, 30 de xaneiro e 1 de febreiro no citado aeroporto.

O Servizo de Vixilancia Aduaneira e os axentes da Garda Civil, que actúan en calidade de Resgardo Fiscal do Estado baixo a dependencia funcional da Dependencia Rexional de Aduanas e II.EE. do País Vasco, diariamente realizan, entre outras actuacións, inspeccións de pasaxeiros e equipaxes segundo criterios preventivos de risco no aeroporto de Bilbao.

A primeira operación desenvolveuse o pasado 17 de xaneiro no control de aduanas do aeroporto. Mentres os axentes realizaban unha inspección fiscal a un pasaxeiro procedente de Bolivia, acharon entre as súas pertenzas, preto de 6.900 euros e de 6.000 dólares americanos, ao ser requirido o documento de declaración de movementos de pagamento acompañado (E-1), o viaxeiro respondeu que non posuía o mesmo, polo que se procedeu a intervir o diñeiro.

As dúas seguintes intervencións desenvolvéronse no filtro de embarque do terminal os pasados días 30 de xaneiro e 1 de febreiro, cando dous pasaxeiros con destino fóra de territorio nacional, portaban respectivamente unha cantidade de diñeiro superior á legalmente establecida sen a citada declaración E-1.

Nestas actuacións os gardas civís acharon nas pertenzas dun pasaxeiro con destino final a Pakistán, máis de 10.200 euros en metálico e no equipaxe dun viaxeiro con pasaxe a Istambul unha cantidade próxima aos 29.000 euros. Ningún presentara ás autoridades a debida declaración de movementos de pagamento.

Os tres infractores foron denunciados ante Servizo Executivo da Comisión para a Prevención do Branqueo de Capitais e Infraccións Monetarias, sendo a sanción á que se enfrontan de ata o 50% do valor dos medios de pagamento empregados. O diñeiro intervido foi depositado no Banco de España.

Obriga de presentar Declaración de Movementos de Medios de Pagamento

As persoas físicas deberán realizar previamente unha Declaración de Movementos de Medios de Pagamento cando realicen os seguintes movementos: 

• Saída ou entrada en territorio nacional de medios de pagamento acompañado ou non por importe igual ou superior a 10.000 euros ou o seu contravalor en moeda estranxeira.
• Movementos por territorio nacional de medios de pagamento por importe igual ou superior a 100.000 euros ou o seu contravalor en moeda estranxeira.

A declaración deberá ser exhibida, sen previo requirimento, antes os Servizos de Aduanas.