O Tribunal Supremo ditou, en data 20 de decembro de 2022, a sentenza 1695/2022, no recurso de casación número 1399/2021, en que fixa doutrina en relación coa dedución das  cotas  de  IVE  soportado.

A cuestión que presentaba interese casacional obxectivo para a formación da xurisprudencia consistía en "[…] Determinar se procede a dedución das cotas de  IVE soportado por unha entidade mercantil na adquisición de bens ou servizos no marco de operacións non suxeitas ou suxeitas e exentas, cando tales bens ou servizos supuxesen un beneficio económico que favorecese a actividade xeral […]".

A conclusión á que chega o Tribunal Supremo fixo a seguinte xurisprudencia en resposta á cuestión con interese casacional:

"a) É procedente a dedución das cotas de  IVE soportado por unha entidade mercantil na adquisición de bens ou servizos no marco de operacións non suxeitas ou suxeitas e exentas, cando tales bens ou servizos supuxesen un beneficio económico que favorecese a actividade xeral.

b) En particular, éo neste caso a dedución do   IVE satisfeito pola prestación de servizos de asesoramento nun procedemento expropiatorio coa finalidade de lograr un maior prezo xusto que o inicialmente recoñecido pola Administración, tendo en conta a natureza do ben expropiado e a súa relación directa coa actividade propia da empresa.

c) Hai dereito a esa dedución do   IVE soportado cando o ben entregado ou o servizo recibido a que dá lugar garde relación ou supoña un beneficio xeral para o suxeito pasivo, aínda que a actividade a que se dirixe estea exenta ou non suxeita, sempre que, ademais dese beneficio xeral, aquí indubidable, as operacións a que se dedica quen reclama a dedución, no marco da súa actividade económica constitúan operacións gravadas, o que neste caso non foi controvertido."

Esta é, polo demais, a solución máis respectuosa co principio de neutralidade fiscal, por virtude do que, o suxeito pasivo debe quedar indemne dos gastos fiscais en concepto de  IVE por razón da recepción de servizos prestados por terceiros que benefician a súa actividade económica xeral suxeita, no seu conxunto, ao imposto harmonizado que nos ocupa.

Podes consultar esta sentenza na seguinte ligazón: STS 4923/2022 de 22/12/22.