Operación contra o narcotráfico

• Detidas catro persoas de diferentes nacionalidades
• Interviñéronse máis de 5.000 plantas en tres rexistros realizados en Hospitalet de Llobregat e Granollers
• No momento dun dos rexistros, os detidos romperon as conducións de auga da plantación para inundar os locais e impedir a actuación

31 de maio de 2023.- Funcionarios de Vixilancia Aduaneira da Axencia Tributaria en Cataluña desmantelaron na provincia de Barcelona tres plantacións dedicadas ao cultivo intensivo de marihuana coa intervención de 5.312 plantas de marihuana e a detención de catro persoas.

A primeira das intervencións da operación, denominada ‘Primavera’, produciuse nunha nave industrial en Hospitalet de Llobregat o pasado 18 de abril, onde os investigadores descubriron unha plantación ‘indoor’ de grandes dimensións nos sotos da mencionada nave e á que a subministración eléctrica chegaba por un túnel que realizaran para evitar que se puidese ver o enganche ilegal. En total interviñéronse 1.931 plantas de marihuana e foron detidas dúas persoas de nacionalidade chinesa.

No momento da intervención polos funcionarios de Vixilancia Aduaneira, os detidos romperon as conducións de auga para inundar os locais e impedir a actuación, polo que se fixo necesaria a intervención dos servizos da empresa subministradora de auga e da Policía Local de Hospitalet de Llobregat.

A seguinte das intervencións produciuse o 3 de maio nunha masía situada nun medio rural próximo a Granollers e apartada doutras edificacións, buscando así a organización a máxima discreción. Nesta masía interviñéronse un total de 1.455 plantas e procedeuse á detención dunha persoa de nacionalidade albanesa. Para a protección da masía a organización ademais tiña dous cans de raza perigosa que se entregaron a unha asociación protectora de animais.

Plantación con alta sofisticación e eficiencia

A última das operacións realizouse o pasado 26 de maio noutra nave no mesmo municipio de Hospitalet de Llobregat, en que se acharon 1.926 plantas ademais de 5.687 gramos de corazóns e 4.404 gramos de picadura de marihuana. Nesta intervención resultou detido un cidadán de nacionalidade española.

Nesta ocasión a plantación chamou a atención pola súa sofisticación, con diferentes dependencias segundo o tipo de planta e estado de crecemento e o uso de distintas substancias e produtos químicos para que o cultivo da marihuana fose máis eficiente, ata o punto de que no momento inicial do rexistro xurdiron dúbidas sobre se podería ser unha instalación legal, feito que quedou descartado.

No desenvolvemento da operación participaron un total de 40 efectivos de Vixilancia Aduaneira de Cataluña co apoio da Unidade de Drones e o Grupo de Intervención.

O obxectivo deste tipo de operacións é intensificar as actuacións contra este tipo de actividade delituosa, de que participan organizacións e grupos criminais de distintas nacionalidades que xa subministran a países de todo o mundo, aínda que o mercado principal é o nacional e europeo.