Con data 17 de xuño celebrouse a reunión anual da Comisión de seguimento do Convenio de colaboración asinada no ano 2004 polo Comité Español de Representantes de Persoas con Discapacidade (Cermi), a Fundación ONCE e a Axencia Tributaria.

Este ano cun matiz especial, pois cúmprense 20 anos da súa sinatura, o 18 de outubro de 2004.

Este acordo sentou as bases para que “servise de apoio e impulso a actuacións futuras, inspiradas en lograr a asistencia e igualdade de oportunidades para as persoas con discapacidade, a fin de subministrarlles información actualizada dos seus dereitos, así como prestarlles apoio e asesoramento no cumprimento das súas obrigas tributarias”, como consta no propio texto.

A reunión estivo presidida polo director do Servizo de Planificación e Relacións Institucionais (Axencia Tributaria) Ignacio Fraisero Aranguren, o presidente do Cermi , Luis Cayo Pérez Bueno; e o vicepresidente primeiro executivo da Fundación ONCE, Alberto Durán López.

Como resultado do realizado durante estes 20 anos, todas as partes asinantes estiveron de acordo en que se mantivo unha relación moi frutífera, avanzando tanto no nivel de información e asistencia tributaria como no ámbito tecnolóxico, co impulso da accesibilidade das ferramentas informáticas necesarias para o cumprimento voluntario das obrigas tributarias.

Avogando por moitos máis anos de estreita colaboración, puxose de manifesto a intención de que máis do 95 por 100 das oficinas de atención ao público da Axencia Tributaria sexan accesibles, que as canles presenciais e dixitais de relación cidadá conten con máis medidas de apoio a este sector da poboación, e que o cadro de persoal da Axencia Tributaria supere na medida do posible a porcentaxe mínima de empregados públicos con discapacidade esixida por Lei.

Todas as partes coincidiron en considerar esta colaboración como unha boa práctica que non só mellorou de xeito apreciable o servizo público da xestión tributaria, senón que se erixiu como marco de referencia para outras administracións interesadas en reforzar a súa dimensión inclusiva coas persoas con discapacidade.