• Hai cinco investigados como presuntos autores dun delito de tráfico de medicamentos e outro contra a Seguridade Social

• Os medicamentos carecían da documentación sanitaria e comercial obrigatoria

19 de decembro de 2025.- Funcionarios da Aduana e de Vixilancia Aduaneira da Axencia Tributaria canda axentes da Garda Civil pertencentes á Sección Fiscal do Aeroporto Tenerife Norte, interviñeron 70.000 medicamentos en 20 maletas facturadas no aeroporto de Tenerife Norte e investigaron a tres homes de 83, 21 e 27 anos de idade e a dúas mulleres de 85 e 55 anos como presuntos autores dun delito contra a saúde pública, na súa modalidade de tráfico de medicamentos e outro delito contra a Seguridade Social.

Os feitos foron detectados durante as inspeccións que se realizan ás maletas facturadas que viaxan nas adegas dos avións. Alí, tras examinar con ‘raios X’ varias maletas que ergueron sospeitas, vixiantes de seguridade alertaron aos axentes da Garda Civil que operan no aeroporto baixo as directrices do Administrador da Aduana

Posteriormente, en diferentes inspeccións realizadas durante dous días, os investigadores descubriron 20 vultos facturados en que encontraron máis de 70.000 medicamentos que estaban en posesión de cinco persoas, tres homes de 83, 21 e 27 anos de idade e dúas mulleres de 85 e 55 anos, que resultaron investigadas. Todos eles eran pasaxeiros que se dispuñan a viaxar de forma independente e en diferentes voos.

Os medicamentos foron intervidos, xa que carecían da documentación correspondente en relación cunha suposta expedición comercial e da conformidade da Axencia Española do Medicamento.

O uso non responsable dos medicamentos, así como a súa venda, transporte e distribución sen unha rastreabilidade e control das autoridades sanitarias, poden derivar en problemas graves de saúde, así como o incumprimento da normativa específica que regula esta materia e que podería comportar sancións administrativas ou penais.